Հայաստանի ՎՊ-ն դատախազութիւն կուղարկի Գեղարքունիքի մարզում
յայտնաբերուած խոշոր խախտումների վերաբերեալ նիւթերը
12-12-2008 14:46:00 | Հայաստան | Տնտեսութիւն
ԵՐԵՎԱՆ, 12 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Հայաստանի Վերահսկիչ
պալատը Գեղարքունիքի մարզպետարանի եւ համայնքների կողմից պետական
ու համայնքային բիւջէների մուտքերի ապահովման, բիւջէտային
միջոցների օգտագործման, միջազգային կառոյցների աջակցութեամբ
իրականացուած մի շարք ծրագրերի նկատմամբ վերահսկողութեան
արդիւնքում յայտնաբերել է 579 մլն դրամի խախտումներ, այդ թւում
151 մլն դրամը` գնումների գործընթացի հետ կապուած: ՎՊ-ի խորհրդի
դեկտեմբերի 10-ին մարզում կայացած արտագնայ նիստում որոշուել է
կոռուպցիոն առաւել մեծ ռիսկեր պարունակող գործերն ուղարկել
դատախազութիւն:
Ըստ ՎՊ-ի պաշտօնական կայք-էջում տեղադրուած հաղորդագրութեան,
նման գործերից մէկն առնչւում է Սեւանի քաղաքապետարանին: Վերջինս,
անտեսելով ՀՀ օրենսդրութեամբ սահմանուած արգելքը, վաճառել է մէկ
մանկապարտէզի, ինչպէս նաեւ միջնակարգ եւ գիշերօթիկ մէկական
դպրոցների շէնքերը:
Յաջորդ կոպիտ խախտումը վերաբերում է Սեւանի Ազգային պարկի
հողատարածքներին. քաղաքապետարանը 47 հեկտար տարածք` 1 քառակուսի
մետրը տարեկան 14 դրամով, վարձակալութեան է տուել գործարար Արայիկ
Հայրապետյանին: Վերջինը լճի ափամերձ տարածքում հիմնել է
«Լավանդա-սիթի»-ն` կառուցելով վաճառքի համար նախատեսուած կապիտալ
շինութիւններ, մինչդեռ կառավարութեան որոշմամբ 1907 մետր նիշից
ցածր տարածքներում կապիտալ շինարարութեան իրականացումն արգելուած է
եւ թոյլատրւում է միայն շարժական տնակների տեղադրում: Բացի այդ,
40-60 հազար ԱՄՆ դոլարի չափով շուկայական արժէք ունեցող
շինութիւնների վաճառքի գինը հարկային մարմիններ ներկայացուած
փաստաթղթերում ձեւակերպուած է 1,5-8 մլն դրամ (շուրջ 5-27 հազար ԱՄՆ
դոլար):
ՎՊ-ն 42-45 մլն դրամի չափով խախտումներ է արձանագրել նաեւ
Վարդենիսի քաղաքապետարանում: Նախկին քաղաքապետին հնարաւորութիւն է
տրուել ներկայացնելու պետութեանը պատճառած վնասը վերականգնելու
ժամանակացույց, սակայն այն չի ներկայացուել, ինչի պատճառով այս
գործը եւս որոշուել է ուղարկել դատախազութիւն:
Մէկ այլ արտառոց դէպք էլ արձանագրուել է մարզի Գեղամասար
գիւղում, ուր պետական միջոցներով երեք ուղղութեամբ խմելու ջրագիծ
է կառուցուել: Սակայն յետագայում պարզուել է, որ «մայր» ջրագիծը,
որին դրանք պէտք է միացուէին, չկայ: «Մայր» ջրագծի 5 800 մետր
խողովակները դատարանի որոշմամբ ապամոնտաժուել եւ վաճառուել սոցապ
հիմնադրամին գիւղապետարանի 1,6 մլն դրամի պարտքը մարելու
նպատակով: Ընդ որում, դատարանի որոշմամբ ջրագծի խողովակների 1
գծամետրի գինը հաշուարկուել են 276 դրամ` այն դէպքում, երբ
շուկայական գինը 8-11 հազար դրամ է: