ԵՐԵՒԱՆՈՒՄ ԿԱՆՑԿԱՑՈՒԻ «ՀԱՅԱՍՏԱՆԻ ՍՈԽԱԿ» ՎՈԿԱԼԻՍՏՆԵՐԻ ԱՌԱՋԻՆ
ՀԱՆՐԱՊԵՏԱԿԱՆ ՄՐՑՈՅԹԸ
18-11-2008 19:55:00 | Հայաստան | Մշակոյթ
ԵՐԵՎԱՆ, 18 ՆՈՅԵՄԲԵՐԻ, ՆՈՅԵԱՆ ՏԱՊԱՆ: Հայաստանում նոյեմբերի
17-ից դեկտեմբերի 14-ը կանցկացուի հռչակաւոր օպերային երգչուհի
Գոհար Գասպարեանի անուան «Հայաստանի սոխակ» խորագրով վոկալիստների
առաջին հանրապետական մրցոյթը: Ինչպէս «ՆՈՅԵԱՆ ՏԱՊԱՆ»-ի թղթակցին
յայտնեցին ՀՀ մշակոյթի նախարարութիւնից, մրցոյթին կմասնակցեն
երաժշտական քոլեջների սովորողները, Երեւանի Կոմիտասի անուան պետական
կոնսերուատորիայի ուսանողներն ու ասպիրանտները, ինչպէս նաեւ 18-32
տարեկան պրոֆեսիոնալ կատարողները:
Մրցութային պարտադիր ծրագրում ընդգրկուած են 17-18 դարերի
կոմպոզիտորների ստեղծագործություններից արիաներ, Կոմիտասի
ստեղծագործությունները, հայ կոմպոզիտորների օպերային արիաներ եւ
ռոմանսներ: Մրցոյթի գալա-համերգն ու յաղթողների պարգեւատրման
արարողութիւնը կկայանայ դեկտեմբերի 14-ին` երգչուհու ծննդեան օրը,
Ալ.Սպենդիարեանի անուան օպերայի եւ բալետի ազգային ակադեմիական
թատրոնում: Մրցութի կազմկոմիտեն յաղթողների համար սահմանել է
դրամական մրցանակներ. առաջին տեղի համար` 300 հազար, 2-րդ տեղի
համար` 250 հազար, 3-րդ տեղի համար` 200 հազար դրամ: Բացի այդ,
նախատեսւում են նաեւ խրախուսիչ մրցանակներ ամենաերիտասարդ
մասնակցի, Գասպարեանի երգացանկի լաւագոյն կատարման, ինչպէս նաեւ
լաւագոյն կոնցերտմայստերի համար:
Օպերային մեծ երգչուհի Գոհար Գասպարեանը մահացել է 2007թ.
մայիսին` 83 տարեկան հասակում: 1949 թուականից նա երգել է 23
օպերաների գլխաւոր արիաները: Երգչուհու երգացանկում ընդգրկուել է
ռուս, գերմանացի, ֆրանսիացի եւ իտալացի կոմպոզիտորների մօտ 500
ստեղծագործութիւն: