ՀԱՅԱՍՏԱՆՈՒՄ ՊԷՏՔ Է ԶԱՐԳԱՑՆԵԼ ՀԻԴՐՈԷՆԵՐԳԵՏԻԿԱՆ,- ՅԱՅՏԱՐԱՐՈՒՄ
Է ՀՀ ԷՆԵՐԳԵՏԻԿԱՅԻ ԵՎ ԲՆԱԿԱՆ ՊԱՇԱՐՆԵՐԻ ՓՈԽՆԱԽԱՐԱՐԸ
06-10-2008 18:00:00 | Հայաստան | Տնտեսութիւն
ԵՐԵՎԱՆ, 6 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հոկտեմբերի 6-ին Երեւանի
Մոսկուայի տանն աշխատանքներն սկսեց «Վերականգնուող էներգետիկայի
շաբաթ» խորագրով համաժողովը, որին մասնակցում են փորձագետներ
ԱՄՆ-ից, Ֆրանսիայից, ԱՊՀ երկրներից: Համաժողովն անցկացւում է ՀՀ
կառավարութեան ու Համաշխարհային բանկի ֆինանսավորմամբ եւ Հայաստանի
վերականգնուող էներգետիկայի եւ էներգախնայողության հիմնադրամի,
«Էքսպոմեդիա» ցուցահանդեսների նախագծման կենտրոնի աջակցութեամբ:
Երկօրեայ համաժողովի ընթացքում մասնակիցները հնարաւորութիւն
կունենան ծանօթանալ հանրապետութեան էներգետիկ ռեսուրսներին,
ներդրումային հնարաւորութիւններին, միջազգային գիտական
նուաճումներին, ֆինանսական միջոցների ներգրաւման տարբերակներին:
Քննարկումները կանցկացուեն «Փոքր հիդրոկայաններ», «Հողմաէներգիա»,
«Կենսաէթանոլ, կենսավառելիք», «Արեգակնային տեխնոլոգիաներ»,
«Ջրածնային էներգետիկա», «Կենսագազ» եւ այլ թեմաներով:
Ինչպէս նշեց ՀՀ էներգետիկայի եւ բնական պաշարների փոխնախարար
Արեգ Գալստեանը, նման համաժողովները հնարաւորութիւն են տալիս
վերհանել ոլորտի առջեւ ծառացած խնդիրներն ու խոչընդոտները,
առաջադրել դրանց լուծման տարբերակները: Ըստ նրա, ոլորտի խնդիրներին
հնարավորինս արագ լուծում տալու նպատակով ստեղծուել է շահագրգիռ
տարբեր գերատեսչութիւնների ներկայացուցիչներից բաղկացած
յանձնաժողով:
Փոխնախարարի խօսքերով, պետութեան քաղաքականութիւնը միտուած է
վերականգնուող էներգետիկայի զարգացմանը: Ըստ Ա.Գալստեանի, մինչեւ
2025թ.-ը հանրապետութիւնում արտադրվելիք էներգիայի 30%-ը
կապահովուի հենց վերականգնուող էներգետիկայի հաշուին: Ըստ այդմ, պէտք
է զարգացնել հիդրոէներգետիկան եւ կրկնապատկել հանրապետութիւնում
գործող փոքր հիդրոէլեկտրակայանների թիւը: Նշուեց նաեւ, որ այսօր
Հայաստանում գործում է 60 ՀԷԿ, նոյնքանն էլ յայտ է ներկայացրել
գործունէութեան լիցնեզիա ստանալու համար: Գործող ՀԷԿ-երը միասին
տարեկան արտադրում են 220 մլն կվտ/ժամից աւելի էլեկտրաէներգիա,
ինչը հանրապետութեան ներքին պահանջարկի ընդամէնը 3-4%-ն է: