ՀԱՅԱՍՏԱՆԻՑ ԹՈՒՐՔԻԱ ԷԼԵԿՏՐԱԷՆԵՐԳԻԱՅԻ ՄԱՏԱԿԱՐԱՐՄԱՆ ՊԱՅՄԱՆԱԳՐԻ
ԻՐԱԿԱՆԱՑՄԱՆ ԱՇԽԱՏԱՆՔՆԵՐԸ ՇԱՐՈՒՆԱԿՒՈՒՄ ԵՆ,- ՅԱՅՏԱՐԱՐՈՒՄ Է ՀՀ
ԷՆԵՐԳԵՏԻԿԱՅԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐԸ
ՀԱՅԱՍՏԱՆԻՑ ԹՈՒՐՔԻԱ ԷԼԵԿՏՐԱԷՆԵՐԳԻԱՅԻ ՄԱՏԱԿԱՐԱՐՄԱՆ ՊԱՅՄԱՆԱԳՐԻ
ԻՐԱԿԱՆԱՑՄԱՆ ԱՇԽԱՏԱՆՔՆԵՐԸ ՇԱՐՈՒՆԱԿՒՈՒՄ ԵՆ,- ՅԱՅՏԱՐԱՐՈՒՄ Է ՀՀ
ԷՆԵՐԳԵՏԻԿԱՅԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐԸ
25-09-2008 18:00:00 | Հայաստան | Տնտեսութիւն
ԵՐԵՎԱՆ, 25 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Թուրքական «Յունիտ»
ընկերութիւնը չի հրաժարուել ՀՀ Էներգետիկայի եւ բնական պաշարների
նախարարութեան ու «Հայաստանի բարձրավոլտ էլեկտրական ցանցեր» ՓԲԸ-ի
հետ Հայաստանից Թուրքիա էլեկտրաէներգիայի մատակարարման վերաբերեալ
պայմանագրից. այն ուժի մէջ է, եւ երկուստեք իրականացւում են
պայմանագրի իրականացման համար անհրաժեշտ աշխատանքները: Այս մասին
յայտարարեց ՀՀ էներգետիկայի եւ բնական պաշարների նախարար Արմէն
Մովսիսեանը:
Յիշեցնենք, որ սեպտեմբերի 10-ին նա յայտնել էր, թէ Հայաստանը
2009թ.-ից էլեկտրաէներգիա կվաճառի Թուրքիային: Ըստ նախարարի, այդ
մասին քննարկումներ են եղել ՀՀ նախագահի հրաւէրով Թուրքիայի
նախագահի Հայաստան կատարած այցի ժամանակ: Հանդիպումների
շրջանակներում նաեւ համաձայնագիր է կնքուել նախարարութեան եւ
թուրքական «Յունիտ» ընկերութեան միջեւ, որն զբաղւում է Թուրքիա
էլեկտրաէներգիայի ներկրմամբ եւ բաշխմամբ: Բացի այդ, ըստ նախարարի,
պայմանագիր է ստորագրուել «Բարձրավոլտ էլեկտրական ցանցեր»-ի եւ
«Յունիտի» միջեւ Կարսի միջով ուղիղ արտահանում իրականացնելու
վերաբերեալ:
Պայմանաւորուածութեան համաձայն, սկզբնական շրջանում տարեկան
կարտահանուի 1,5 մլրդ Կվտ/ժ էլեկտրաէներգիա: Հզորութիւնների
մեծացմանը զուգընթաց հնարաւոր է արտահանումը հասցնել մինչեւ 3,5
մլրդ Կվտ/ժ-ի: Թուրքական կողմը պարտաւորուել է առաջիկայ չորս
ամիսների ընթացքում վերացնել տեխնիկական խնդիրները եւ վերականգնել
էլեկտրահաղորդման գծերը:
Սակայն յետագայում Թուրքիայի էներգետիկայի նախարար Հիլմի
Գյուլերը հերքել է տարածուած բոլոր այն լուրերը, որոնց համաձայն,
Աբդուլլահ Գիւլի երեւանեան այցելութեան ժամանակ Թուրքիայի եւ
Հայաստանի միջեւ կնքուել է համաձայնագիր էլեկտրաէներգիա գնելու
կապակցութեամբ: Այս մասին հաղորդել էր «Սաբահ» օրաթերը:
«Նման պայմանագիր գոյութիւն չունի: Կան 1980 թուականին եւ
դրանից առաջ կառուցոուած էլեկտրահաղորդագծեր, բայց որեւէ
համաձայնագիր գոյութիւն չունի»,- յայտարարել է թուրք պաշտօնեան`
աւելացնելով, որ այդ ուղղութեամբ որոշ թուրքական մասնաւոր
ընկերութիւններ են բանակցութիւններ վարել:
«Այդ յայտարարութիւններին ուշադրութիւն մի դարձրեք եւ պէտք
էլ չէ գռգռել նրանց»,- նշել է ՀՀ էներգետիկայի եւ բնական պաշարների
նախարարը` յաւելելով, որ «Հայաստան էր ժամանել «Յունիտ»-ի
նախագահը, որն ազգութեամբ թուրք, էներգետիկ ոլորտում փորձառու
գործարար է եւ բաւականին ճիշտ է ընկալում հայ-թուրքական
յարաբերութիւնների ներկայիս իրավիճակը»:
Նա պարզաբանեց, որ «Յունիտը» թուրքական
կոնգլոմերատ-ընկերութիւն է, որի հիմնականում նոյն անուանումը կրող
կառոյցները գործում են Բելգիայում, եւրոպական որոշ այլ
երկրներում, Իրանում, ԱՄՆ-ում: «Յունիտը» տարբեր ոլորտներում է իր
գործունէութիւնը ծաւալում, բայց գործունէութեան հիմնական ոլորտը
էներգետիկան է: