ՀՀ ՏՆՏՄՐՑԱԿՑՈՒԹՅԱՆ ՊԱՇՏՊԱՆՈՒԹԵԱՆ ՊԵՏՅԱՆՁՆԱԺՈՂՈՎԸ ՄԻԱԺԱՄԱՆԱԿ
ՎԱՐՈՒՅԹՆԵՐ Է ՀԱՐՈՒՑԵԼ ԱՒԻԱՎԱՌԵԼԻՔԻ, ՑՈՐԵՆԻ ԱԼԻՒՐԻ ԵՎ ԲՐՆՁԻ
ՇՈՒԿԱՆԵՐՈՒՄ
17-09-2008 20:00:00 | Հայաստան | Տնտեսութիւն
ԵՐԵՎԱՆ, 17 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: ՀՀ Տնտեսական
մրցակցութեան պաշտպանութեան պետական յանձնաժողովի սեպտեմբերի 17-ի
արտահերթ նիստում վարոյթ է յարուցուել աւիավառելիքի, ցորենի
ալիւրի եւ բրնձի շուկաներում գների չհիմնաւորուած պահպանման կամ
բարձրացման հնարաւոր փաստերի առիթով:
Յանձնաժողովի աշխատակազմի մոնիտորինգի համաձայն, ցորենի
ալիւրի իրացման գների դինամիկան ոչ համարժէք է միջազգային շուկայի
գների դինամիկային: Շուկայում գերիշխող դիրք են զբաղեցնում «Սալեքս
Գրուպ» եւ «Մանանայ Գրեյն» ընկերութիւնները: Յանձնաժողովը ցորենի
ալիւրի շուկայում հակամրցակցային համաձայնութեան երեւոյթներ էր
արձանագրել դեռեւս յուլիսի 22-ին` ոլորտի տնտեսվարողների հետ
անցկացուած քննարկում-խորհրդակցութեան ժամանակ: Յանձնաժողովն այդ
ժամանակ նախազգուշացրել էր տնտեսվարողներին` զերծ մնալ
հակամրցակցային համաձայնութիւններից եւ ժամկէտ սահմանել հնարաւոր
խախտումները վերացնելու համար:
Օգոստոսի 8-ին Վրաստանում ստեղծուած պատերազմական իրավիճակի
պատճառով Հայաստանեան շուկայի համար ֆորս-մաժորային վիճակ ստեղծուեց
եւ բեռներն ընդհանրապես Հայաստան հասցնելու հետ կապուած խնդիրներ
առաջացան: Դրանով պայմանաւորուած յանձնաժողովը հետաձգեց վարոյթի
հարուցման որոշումը` մինչեւ բեռնափոխադրումների շուկան կայունանայ:
Իրավիճակի կայունացումից յետոյ, սակայն, հայաստանեան շուկայում
գների իջեցումը, նախնական գնահատականով, համարժէք չէ միջազգային
շուկայում ցորենի ալիւրի գնանկմանը:
Ըստ յանձնաժողովի մամլոյ ծառայութեան, մոնիտորինգը գների
բարձրացում է արձանագրել նաեւ բրնձի շուկայում: Այս շուկայում
գերիշխող դիրք են զբաղեցնում «Կարի Թով» եւ «Մոկոնաթ»
ընկերութիւնները, որոնք գրաւում են շուկայի 59,6 տոկոսը: Սակայն,
հաշուի առնելով այն հանգամանքը, որ հայաստանեան շուկայում բրնձի
թանկացումը համատարած բնոյթ է կրում, յանձնաժողովի հարուցած
վարոյթը կընդգրկի շուկայի առնուազն 90 տոկոսը գրաւող տնտեսվարող
սուբյեկտների վարքագծի ուսումնասիրութիւնը:
Յանձնաժողովի մէկ այլ որոշմամբ վարոյթ է յարուցուել նաեւ
աւիավառելիքի շուկայում գների ուսումնասիրութեան նպատակով, քանի որ
միջազգային շուկայում աւիավառելիքի գնանկում է արձանագրուել: