ԵՐԵՎԱՆ, 11 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Աւարտուել է
Իրան-Հայաստան գազատարի կառուցումը: Այս մասին, ըստ «Ազգ»
օրաթերթի, լրագրողների հետ ճեպազրույցում յայտնել է ՀՀ
էներգետիկայի եւ բնական պաշարների նախարար Արմէն Մովսիսեանը: Ըստ
նախարարի, մնում է միայն աւարտել գազատարի Քաջարան-Երեւան հատուածի
թողունակութեան բարձրացման աշխատանքները, ինչը նախատեսուած է մինչեւ
այս տարուայ նոյեմբեր: Շուտով կսկսուեն գազատարի փորձարկման
աշխատանքները, որոնց աւարտից յետոյ հնարաւոր կլինի այն ամբողջ
հզորութեամբ օգտագործել:
Ա.Մովսիսեանի խօսքերով, գազատարը հնարաւորութիւն կտայ տարեկան
մինչեւ 2,3-2,5 մլրդ խմ գազ ներմուծելու Հայաստան: Թէ որքանո՞վ
կօգտագործուի գազատարը, կախուած է պահանջարկից: Իրանական գազը
կօգտագործուի ռուսական գազին զուգահեռ` անհրաժեշտութեան դէպքում:
«Սա հնարաւորութիւն կտայ տարբեր ֆորսմաժորային իրավիճակներում
այնպիսի գազասնուցում ապահովելու, որ երկրում ցնցումներ չլինեն»,-
նշել է նախարարը: