2008 Թ.-Ի ՅՈՒՆՈՒԱՐ ՅՈՒԼԻՍԻՆ ՆԱԽՈՐԴ ՏԱՐՈՒԱՅ ՆՈՅՆ
ԺԱՄԱՆԱԿԱՀԱՏՈՒԱԾԻ ՀԱՄԵՄԱՏ ՀԱՅԱՍՏԱՆՈՒՄ ՀՆԱ-Ն 10,6%-ՈՎ ԱՃԵԼ Է
20-08-2008 17:00:00 | Հայաստան | Տնտեսութիւն
ԵՐԵՎԱՆ, 20 ՕԳՈՍՏՈՍԻ, ՆՈՅԵԱՆ ՏԱՊԱՆ: 2008թ.-ի
յունուար-յուլիսին նախորդ տարուայ նոյն ժամանակահատուածի համեմատ
Հայաստանի ՀՆԱ-ն աճել է 10,6%-ով եւ կազմել 1 տրլն 736 մլրդ 187,7
մլն դրամ: ՀՆԱ-ի ինդեքս-դեֆլեատորը կազմել է 108%:
ՀՀ Ազգային վիճակագրական ծառայութեան տուեալներով, այս տարուայ
յունուար-յուլիսին, նախորդ տարուայ նոյն ամիսների համեմատ,
հանրապետութիւնում արդիւնաբերական արտադրանքի ծաւալը աճել է
1,8%-ով եւ կազմել 428 մլրդ 184,9 մլն դրամ:
Գիւղատնտեսութեան համախառն արտադրանքն աճել է 6,9%-ով եւ
կազմել 220 մլրդ 610,4 մլն դրամ, շինարարութեան ծաւալը` 14%-ով եւ
կազմել 356 մլրդ 107,2 մլն դրամ, մանրածախ առեւտրաշրջանառությունը`
6,1%-ով եւ կազմել 500 մլրդ դրամ, իսկ ծառայութիւնների ծաւալը
աճել է 15%-ով եւ կազմել 389 մլրդ 82,9 մլն դրամ:
ՀՀ արտաքին առեւտրաշրջանառութեան ծաւալը նախորդ տարուայ
յունուար-յուլիսի համեմատ աճել է 29,5%-ով եւ կազմել 2 մլրդ 920,2
մլն դոլար: Ընդ որում, արտահանումը նուազել է 0,2%-ով եւ կազմել
628,1 մլն դոլար, իսկ ներմուծումն աճել է 40,9%-ով եւ կազմել 2
մլրդ 292,1 մլն դոլար:
2008թ.-ի յունուար-յուլիսին սպառողական գները 2007թ.-ի
յունուար-յուլիսի համեմատ աճել են 9,2%-ով, իսկ արդիւնաբերական
արտադրանքի գները` 5,8%-ով:
Այս տարուայ յուլիսի վերջին նախորդ տարուայ նոյն ժամկէտի համեմատ
պաշտօնապէս գրանցուած գործազուրկների թուաքանակը 8,3%-ով նուազել է եւ
կազմել 76 200 մարդ:
Այս տարուայ առաջին եօթ ամիսներին միջին ամսական անուանական
աշխատավարձը կազմել է 87 908 դրամ (նախորդ տարուայ նոյն
ժամանակահատուածի համեմատ աճել է 20,4%-ով), այդ թւում` բիւջէտային
աշխատողներինը` 62 253 դրամ (աճել է 16,7%-ով), ոչ բիւջէտային
հիմնարկների աշխատողներինը` 108 679 դրամ (աճել է 19,6%-ով): Այս
տարուայ յունուար-յուլիսին 1 ԱՄՆ-ի դոլարի միջին փոխարժեքը կազմել է
306,84 դրամ (2007թ.-ին այդ ցուցանիշը կազմել է 342,08 դրամ):