ԳՆԱՃԻ ԶՍՊՄԱՆ ԿԱՌԱՎԱՐՈՒԹԵԱՆ ԾՐԱԳԻՐՆ ՈՒՆԻ 4 ՈՒՂՂՈՒԹԻՒՆ
11-06-2008 23:00:00 | Հայաստան | Տնտեսութիւն
ԵՐԵՎԱՆ, 11 ՅՈՒՆԻՍԻ, ՆՈՅԵԱՆ ՏԱՊԱՆ: «Սպառողական ապրանքների
գների աճը վտանգում է աղքատութեան յաղթահարման ծրագրի արդիւնաւէտ
իրականացումը, ուստի խնդիրը կառավարութեան ուշադրութեան կենտրոնում
է»,- յունիսի 11-ին Ազգային ժողովում յայտարարեց ՀՀ վարչապետ
Տիգրան Սարգսեանը:
Պատգամաւորի այն հարցին, թէ ինչո՞ւ Հայաստանի շուկան չի
արձագանքում միջազգային շուկայում որոշ ապրանքատեսակների գների
կտրուկ նուազմանը, վարչապետը նշեց, որ համաշխարհային շուկաներից
եկող գնաճային ճնշումները դեռեւս պահպանւում են: Նա, մասնաւորապէս,
մատնանշեց վառելիքի գները, որոնք վերջին 4 տարիների ընթացքում 4
անգամ աճել են: Ըստ վարչապետի, համաշխարհային շուկայում նկատւող
գների կտրուկ տատանումները` թէ' աճը, եւ թէ' նուազումը, ուղղակիօրէն
չեն անդրադառնում հանրապետութեան շուկայական գների վրայ:
Տ.Սարգսեյանի խօսքերով, գների աճի զսպման կառավարութեան կողմից
մշակւող ծրագիրը ներառում է 4 ուղղութիւններ: Դրանցից առաջինը
հակաբյուջետային քաղաքականութեան իրականացումն է, քանի որ գնաճային
ճնշումները զսպելու համար պէտք է ունենալ զսպողական բիւջէ:
Երկրորդը` ԿԲ-ի կողմից իրականազվող դրամավարկային
քաղաքականությունն է, քանի որ գնաճը զսպելու համար ԿԲ-ն պարտաւոր է
բարձրացնել վերաֆինանսաւորման տոկոսադրույքները: Երրորդ
ուղղութիւնը մրցակցային դաշտի ստեղծումն է: Այս հարցում մեծ
դերակատարութիւն պէտք է ունենայ Տնտեսական մրցակցութեան պետական
յանձնաժողովը, որը համալիր ստուգումներ է անցկացնում այն
շուկաներում, որտեղ մրցակցութեան բացակայութեան պատճառով գներն
արագօրէն բարձրանում են, բայց իջնում են շատ դանդաղ: Յանձնաժողովն
իր ստուգումների արդիւնքները յայտնում է հարկային մարմիններին,
որոնք նույնպես հնարաւորութիւն ունեն ստուգումներ կատարել եւ
բացայայտել գերշահոյթների դէպքերը: Եվ վերջապէս,
գիւղատնտեսութեան արտադրանքի աճը, որը, սպառողական զամբյուղում
սննդամթերքի տեսակարար կշռի բարձր մակարդակի պատճառով, զսպող
ազդեցութիւն ունի գների մակարդակի վրայ: Ըստ վարչապետի, որպէսզի
վերավաճառողները չկարողանան գիւղացիներին թելադրել իրենց գները,
նույնպես անհրաժեշտ է ներդնել մրցակցային մեխանիզմներ: