Յունուար ամսուայ ընթացքում Հայաստանի պետական բիւջէ են
մուտքագրուել 545,2 մլն դրամի այլ հարկեր
03-03-2010 16:38:00 | Հայաստան | Տնտեսութիւն
ԵՐԵՎԱՆ, 3 ՄԱՐՏԻ, ՆՈՅԵԱՆ ՏԱՊԱՆ: Յունուար ամսուայ ընթացքում
Հայաստանի պետական բիւջէ են մուտքագրուել 545,2 մլն դրամի այլ
հարկեր: Մասնաւորապէս, 145,9 մլն դրամ են կազմել «Կոնցեսիայի
մասին» ՀՀ օրէնքով սահմանուած կոնցեսիոն վճարը, 146,4 մլն դրամ`
ճանապարհային վճարները, 107,2 մլն դրամ` հանրային ծառայութիւնների
կարգաւորման պարտադիր վճարները, 53,7 մլն դրամ` «Հարկերի մասին» ՀՀ
օրէնքի խախտման համար սահմանուած տուգանքները, 87,4 մլն դրամ` ՀՀ
կառավարութեանն առընթեր հարկային պետական ծառայութեան նիւթական
խրախուսման ֆոնդի եկամուտները: Նախորդ տարուայ յունուար ամսուայ համեմատ
այլ հարկերի փաստացի ցուցանիշը գրեթէ փոփոխութիւն չի կրել:
Ինչպէս «ՆՈՅԵԱՆ ՏԱՊԱՆ»-ին յայտնում են Հայաստանի Ֆինանսների
նախարարութիւնից, հաշուետու ժամանակահատուածում պետական բիւջէի այլ
եկամուտները կազմել են 4,2 մլրդ դրամ եւ 68,5%-ով ապահովել
եռամսյակային ծրագրային ցուցանիշը: 2009թ.-ի նոյն ժամանակահատուածի
համեմատ այլ եկամուտներն աճել են 2,1 անգամ, ինչը հիմնականում
պայմանաւորուած է բանկերում եւ այլ ֆինանսավարկային
հաստատութիւններում բիւջէի ժամանակաւոր ազատ միջոցների
տեղաբաշխումից եւ դեպոզիտներից ստացւող տոկոսավճարների աճով:
2010թ.-ի յունուար ամսուայ ընթացքում արտաքին աղբիւրներից
պաշտօնական դրամաշնորհներ չեն ստացուել:
Այս տարուայ յունուարին ԱՄՆ դոլարի միջին փոխարժեքը կազմել է
377,53 դրամ: