Հայաստանի դեսպան Արմէն Մելքոնեանն այցելել է Ալեքսանդրիա
25-02-2010 18:42:00 | | Քաղաքական
ԱԼԵՔՍԱՆԴՐԻԱ, 25 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Եգիպտոսում
Հայաստանի դեսպան Արմէն Մելքոնեանը փետրուարի 22-24-ին այցելել է
Ալեքսանդրիայում, որտեղ նրան ընդունել է Ալեքսանդրիայի նահանգապետ,
գեներալ Ադել Ալի Լաբիբը:
Զրուցակիցները երկուստեք գոհունակութիւն են յայտնել
հայ-եգիպտական բարեկամական յարաբերութիւնների զարգացման ընթացքի
կապակցութեամբ եւ քննարկել Ալեքսանդրիայի նահանգի ընդգրկմամբ
երկկողմ համագործակցութեան հեռանկարների հետ կապուած հարցեր:
Մասնաւորապէս կարեւորվել է Ալեքսանդրիայի գործարարների ներգրաւումը
հայ-եգիպտական գործարար ծրագրերում, նաեւ` այս տարուայ աշնանը
Եգիպտոսում նախատեսւող Հայաստանի մշակոյթային օրերի շրջանակներում
Ալեքսանդրիա քաղաքում որոշակի միջոցառումների կազմակերպումը:
Ա.Մելքոնեանը հանդիպումեր է ունեցել նաեւ տեղի Գործարարների
միութիւնում, Ալեքսանդրիայի գրադարանում եւ համալսարանում:
Ըստ ՀՀ ԱԳՆ Մամուլի եւ տեղեկատուութեան վարչութեան
հաղորդագրութեան, այցի ընթացքում Ա.Մելքոնեանը հիւրընկալուել է
Ալեքսանդրիայի Հայոց առաջնորդարանում, ուր զրուցել է հայ համայնքի
ներկայացուցիչների հետ` պարզաբանումներ տալով հայրենիքի շուրջ
նրանց յուզող բազմաթիւ հարցադրումներին: