ՎԱՇԻՆԳՏՈՆ, 18 ՓԵՏՐՈՒԱՐԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Իսկական
յաղթական հերոսի պես` խլացուցիչ օվացիայով, դիմաւորեցին երեքշաբթի
վաշինգտոնցիները «Սպարտակ» ներկայացումը: «Հիացմունքի անզուսպ
պայթիւն», ըստ ԻՏԱՌ-ՏԱՍՍ-ի թղթակցի, առաջացրեց հասարակութեան մէջ
Արամ Խաչատրեանի լեգենդար բալետը Եուրի Գրիգորովիչի բեմադրութեամբ,
որով իր հիւրախաղերն սկսեց ԱՄՆ-ում Ռուսաստանի Մեծ թատրոնը:
Վաշինգտոնի ամենախոշոր համերգային համալիրը` Քենեդու անուան
արուեստների կենտրոնը լեփ-լեցուն էր: Շատ հանդիսականներ
երեխաների հետ էին: «Սպարտակը» Մեծ թատրոնում բեմադրուել է 1968
թուականին, հսկայական հաջողութեամբ շրջագայել տասնեակ երկրներում,
մի քանի պտոյտ գործելով երկրագնդի շուրջ: Պարարուեստի այս
«բլոկբաստերը» ստրուկների ապստամբութեան մասին քանիցս ներկայացուել
է նաեւ ԱՄՆ-ում, սակայն ամերիկեան հանդիսականը նախկինի պես նրան
սպասում է անհամբերութեամբ: Ներկայիս «Սպարտակը» արդարացրեց
ամերիկացիների սպասումները: Քենեդու կենտրոնի հասարակութեանը
տառացիօրէն ցնցեց 21-ամեայ շնորհալի պարող Իվան Վասիլեւը, որը
հանդէս էր գալիս գլխաւոր դերում: Նա ոչնչով` ոչ տեխնիկապղէս, ոչ
դերասանական առումով, ոչ միայն չզիջեց, այլեւ կրքերի շիկացումով
նոյնիսկ գերազանցեց իր անուանի ազգանվանակից Վլադիմիր Վասիլեւին,
Սպարտակի առաջին դերակատարին: Հոյակապ Մորիս Լիեպային յիշեցրեց
Բալետի պետական ակադեմիայի մենապարող Ալեքսանդր Վոլչկովը, որը
չափազանց համոզիչ էր Կրասոսի դերում: Անթերի էին նաեւ կանանց
դերակատարները` Մեծ բալետի պրիմաներ Նինա Կապցովան եւ Մարիա
Ալլաշը: Ըստ ԻՏԱՌ-ՏԱՍՍ-ի թղթակցի, «հրաշալի էր ամէն բան` եւ կախարդ
բեմանկարիչ Սիմոն Վիրսալաձեի հինաւուրց թանկագին որմնանկար
յիշեցնող դեկորացիաները, եւ Խաչատրեանի հանճարեղ երաժշտութիւնը,
որ հնչում էր ամերիկեան նուագախմբի կատարմամբ Պաւել Սորոկինի
գլխաւորութեամբ»: Դահլիճը ռուսաստանցիներին պարգեւատրեց երկարատեւ
ծափահարություններով: Երբ ներկայացման վերջում բեմ դուրս եկաւ
Եուրի Գրիգորովիչը, հանդիսատեսները ոտքի կանգնեցին ողջունելու
83-ամեայ վարպետին: