ՀՀ սփիւռքի նախարարն ընունեց Հայ Կաթողիկէ Պատրիարքարանի
«Սբ.Գրիգոր Նարեկացի» կենտրոնի տնօրենին եւ հայագիտութեան
զարգացման գրասենեակի վարիչին
12-02-2010 11:00:00 | Հայաստան | Հասարակութիւն
ԵՐԵՎԱՆ, 12 ՓԵՏՐՈՒԱՐԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Հայաստանում
են գտնւում Հայ Կաթողիկէ Պատրիարքարանի «Սբ. Գրիգոր Նարեկացի»
կենտրոնի տնօրէն Վարդան վարդապետ Գազանճեանը եւ նոյն կենտրոնի
Դպրոցական հայագիտութեան զարգացման գրասենեակի վարիչ Վարդան
Թաշճեանը: Այցի նպատակն է Սփիւռքի կրթական համակարգի հետ
առնչութիւն ունեցող Հայաստանի պետական մարմիններին ներկայացնել
բոլորովին վերջերս Բեյրութում լոյս տեսած «Հայ մանկավարժ»
ուսումնասիրական-մանկավարժական հանդէսի առաջին համարը: Երեւանում
սփիւռքահայ գործիչներին ընդունեց Հայաստանի Սփիւռքի նախարար
Հրանուշ Յակոբեանը: Նախատեսւում են նաեւ նրանց հանդիպումները
Հայաստանի Գիտութեան եւ կրթութեան նախարար Արմէն Աշոտեանի, ինչպէս
նաեւ հայաստանեան մի շարք բուհերի ռեկտորների հետ:
ՀՀ սփիւռքի նախարարի հետ հանդիպմանը ծաւալուած շահագրգիռ
քննարկման ժամանակ նշուեց, որ համահայկական դասագիրք հայոց լեզուի եւ
պատմութեան վերաբերեալ Սփիւռքում չկայ, իւրաքանչիւր ուսուցիչ
իւրովի է լուծում հարցը, ուստի ոչ միայն նման դասագրքերի, այլեւ
դպրոցական կրթութեան մեթոդոլոգիա մշակելու կարիք կայ: Նախարար
Յակոբեանը առաջարկեց հիւրերին Լիբանան վերադառնալուց յետոյ 20-օրեայ
ժամկէտում իրեն տրամադրել ուսուցիչների ցանկը, որոնք
վերապատրաստում կանցնեն Հայաստանում:
Նախարարը յայտնեց, որ մայիսի 29-30-ը նախարարութեան
նախաձեռնութեամբ Երեւանում անցկացուելու է «Արեւմտահայերենի
ուսուցման վիճակը Սփիւռքում» թեմայով գիտակրթական համաժողով:
Հ.Յակոբեանը հիւրերին ներկայացրեց Հայաստանի կառավարութեան,
ինչպէս նաեւ Սփիւռքի նախարարութեան առաջիկայ ծրագրերը:
Մասնաւորապէս, տեղեկացվեց, որ նպատակ կայ ստեղծել Ազգային խորհուրդ,
որն իրենից ներկայացնելու է համահայկական համակարգող ղեկավար
մարմին, որում հաւասար մասնակցութիւն են ունենալու Հայաստանի եւ
Սփիւռքի ներկայացուցիչները. ըստ ուսումնասիրությունների, այսօր
Սփիւռքում կայ 30 հազար հայկական կազմակերպութիւն:
Սփիւռքում հնարաւոր կազմակերպչական աշխատանքը Սփիւռքի
կառոյցներում իրականացնելուց յետոյ միայն հնարաւոր է սկսել Ազգային
խորհրդի ձեւաւորման աշխատանքները, որի կառուցուածքի եւ կանոնակարգի,
աշխատակարգի վերաբերեալ կարծիքներ եւ առաջարկութիւններ ակնկալում
ենք լսել սփյուքյան կազմակերպություններից, անհատներից,
լրագրողներից:
Լիբանանահայ հիւրերը հրաւիրեցին նախարարին ներկայ գտնուել
ինչպէս այս փետրուարին կայանալիք «Հայ մանկավարժ»
ուսումնասիրական-մանկավարժական պարբերականի շնորհանդէսին, այնպէս
էլ «Սբ. Գրիգոր Նարեկացի» կենտրոնի շէնքի բացման
հանդիսութիւններին, որը տեղի կունենայ ապրիլ ամսին: