ՀՀ տրանսպորտի եւ կապի նախարարը մասնակցում է «ԱՐՄԵՔՍ 2010»
միջազգային համաժողովին
10-02-2010 20:30:00 | Հայաստան | Տնտեսութիւն
ԵՐԵՎԱՆ, 10 ՓԵՏՐՈՒԱՐԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: ՀՀ
տրանսպորտի եւ կապի նախարար Գուրգէն Սարգսեանը մասնակցում է Իրանի
Իսլամական Հանրապետութիւնում փետրուարի 9-10-ը անցկացուող
«Ներդրումային եւ առեւտրային հնարաւորութիւնները Հայաստանում»
թեմայով` «ԱՐՄԵՔՍ 2010» միջազգային համաժողովին:
Ինչպէս տեղեկացնում են ՀՀ տրանսպորտի եւ կապի նախարարութիւնից,
միջոցառման նպատակը Հայաստանի Հանրապետութեան տնտեսութեան
ներդրումային մեծ ունակութիւն ունեցող բնագաւառների ներկայացումն
է եւ համագործակցութեան նոր եզրերի ի յայտ բերումը:
Ներդրումային ծրագրերի հետ կապուած Գ.Սարգսեանն անդրադարձել է
տրանսպորտի եւ հաղորդակցութեան բնագաւառներին նշելով, որ այդ երկու
ճիւղերը մեծ դեր ունեն տնտեսութեան ընդհանուր զարգացման գործում:
Մասնաւորապէս, նախարարն առանձնացրել է «Հիւսիս-Հարաւ»
աւտոմոբիլային ճանապարհի կառուցման եւ Հայաստան-Իրան երկաթուղու
կառուցման նախագծերը: Գ.Սարգսեանը նշել է, որ երկու բարեկամական
երկրների միջեւ ուղիղ երկաթուղային կապի ստեղծումը կհանդիսանայ ոչ
միայն խթանիչ ուժ երկկողմ բեռնաշրջանառութեան համար, այլեւ կկապի
Պարսից Ծոցի եւ Սեւ ծովի խոշորագոյն նաւահանգիստները`
հնարաւորութիւն ստեղծելով անհամեմատ մեծացնել Իրանի եւ Հայաստանի
տարանացիկ նշանակութիւնը, իսկ «Հիւսիս-Հարաւ» աւտոմոբիլային
ճանապարհի կառուցումը կբարձրացնի ներկայիս գործող Իրանի հետ
սահմանամերձ Մեղրի քաղաքից մինչեւ վրացական Փոթի եւ Բաթումի
նաւահանգիստներ տանող աւտոմոբիլային ճանապարհի թէ' որակը եւ թէ'
թողունակությունը:
Գ.Սարգսեանը մանրամասն ներկայացրել է երկու նախագծերի
իրականացման ընթացքը եւ պատրաստակամութիւն յայտնել քննարկելու
իրանական ընկերութիւնների մասնակցութիւնը նախագծերի իրականացման
բոլոր փուլերին: