ԵՐԵՎԱՆ, 25 ՅՈՒՆՎԱՐԻ, ՆՈՅԵԱՆ ՏԱՊԱՆ: ԵԱՀԿ երեւանեան գրասենեակի նախաձեռնութեամբ յունվարի 25-ին հանրութեանն է ներկայացուել «Քաղաքացիական ձեռնարկ յանուն անվտանգութեան եւ շրջակայ միջավայրի» (ՔՁԱՇ) փոքր դրամաշնորհային ծրագիրը: Ըստ ԵԱՀԿ երեւանեան գրասենեակի հաղորդագրութեան, ծրագիրը կոչուած է աջակցութիւն տրամադրելու քաղաքացիական հասարակութեան կազմակերպութիւնների` բնապահպանական եւ անվտանգութեան մարտահրավերները դիմագրաւելու ջանքերին: ՔՁԱՀ ծրագիրը Հարաւային կովկասում «Շրջակայ միջավայր եւ անվտանգութիւն» (ՇՄԱ) նախաձեռնութեան մաս է կազմում, որի նպատակն է ապահովել բնապահպանական հարցերի շուրջ սահմանակից գործակցութեան շրջանակներ, խթանել խաղաղութիւնն ու կայունութիւնը` բնապահպանական համագործակցութեան եւ կայուն զարգացման միջոցով: «Շրջակայ միջավայր եւ անվտանգութիւն» նախաձեռնութիւնը ԵԱՀԿ, ՄԱԶԾ, ՄԱԿ-ի բնապահպանական ծրագրի, ՄԱԿ-ի Եւրոպայի տնտեսական յանձնաժողովի եւ Կենտրոնական ու արելյան եւրոպայի տարածաշրջանային բնապահպանական կենտրոնի համատեղ ծրագիր է` ՆԱՏՕ-ի կից անդամակցութեամբ: «Քաղաքացիական ձեռնարկ յանուն անվտանգութեան եւ շրջակայ միջավայրի նախաձեռնութիւնը տրամադրում է աջակցութիւն շրջակայ միջավայրի եւ անվտանգութեան ոլորտում գործունէութեանը եւ խթանում է քաղաքացիական հասարակութեան, պետական կառոյցների եւ գործարար համայնքի համագործակցութիւնը: Նախագծերը, որ ստացել ենք քաղաքացիական խմբերից, ցոյց են տալիս Հայաստանում բնապահպանական խնդիրներ լուծելու ուղղութեամբ ջանքեր գործադրելու ներուժն ու պատրաստակամութիւնը»,- նշել է ԵԱՀԿ երեւանեան գրասենեակի տնտեսական եւ բնապահպանական հարցերով պատասխանատու Քրիսթոֆ Օպֆերմանը: ՇՄԱ-ի հարցերով պատասխանատու եւ մրցութային յանձնաժողովի անդամ Նունէ Զաստուխովայի խոսքերմվ, ՔՁԱՀ նախաձեռնութիւնը հետամուտ է խրախուսելու արդիւնաւէտ համագործակցութիւն ոչ-կառավարական կազմակերպութիւնների, իշխանութիւնների եւ այլ շահառուների միջեւ, ինչպէս նաեւ ներառում է տարածաշրջանային գործակցութիւն: ԵԱՀԿ երեւանեան գրասենեակը յայտարարել էր ծրագրերի մրցոյթ 2009թ. նոյեմբերին: Մրցութային յանձնաժողովը ընտրել է հինգ ծրագրի նախագիծ իրականացման առաջին փուլի համար: Ընտրութեան հիմնական չափանիշները ներառում են` բարձր հանրային եւ քաղաքական իրազեկուածութիւնը, կազմակերպչական հմտութիւնները եւ ակնառու բնապահպանական համագործակցութիւնը: Հայաստանում ՔՁԱՀ ծրագիրը հովանաւորւում Է Աուստրիայի կառավարութեան եւ Շրջակայ միջավայր եւ անվտանգութիւն (ՇՄԱ) նախաձեռնութեան կողմից:

---