ԱՄՆ-Ը ՊԱՏԺԱՄԻՋՈՑՆԵՐ Է ՍԱՀՄԱՆՈՒՄ «ՌՈՍՕԲՈՐՈՆԷՔՍՊՈՐՏԻ» ԴԷՄ
24-10-2008 17:08:00 | ԱՄՆ | Միջազգային
ՎԱՇԻՆԳՏՈՆ, 24 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Ամերիկեան արտաքին
քաղաքական գերատեսչութիւնը երկու տարով պատժամիջոցներ է սահմանում
ռուսական «Ռոսօբորոնէքսպորտ» ընկերութեան դէմ:
ԱՄՆ-ի պետդեպարտամենտը ռուսաստանեան սպառազինություններ
արտահանողին մեղադրում է Իրանի զինուած ուժերի հետ
համագործակցութեան եւ զանգվածային ոչնչացման զէնքի եւ այդ զէնքի
փոխադրման միջոցների, ներառեալ բալիստիկ հրթիռների, պատրաստման
տեխնոլոգիաների տարածման մէջ: Պատժամիջոցների սահմանման համար
իրաւաբանական հիմք է ծառայել զանգվածային ոչնչացման զէնքի եւ
Սիրիայում, Իրանում եւ Հիւսիսային Կորեայում նրա ստեղծման
տեխնոլոգիաների տարածմանը հակազդեցութեան մասին օրէնքը:
Ինչպէս հաղորդում է «Ինտերֆաքսը», ԱՄՆ-ի բոլոր պետական
կազմակերպություններին այսուհետ արգելուած է «Ռոսօբորոնէքսպորտին»
ցուցաբերել ցանկացած աջակցութիւն, գնել նրա արտադրանքը կամ օգտուել
նրա ծառայութիւններից: Դրանից բացի, ռուսական ընկերութիւնը
զրկվում է ԱՄՆ-ում ռազմական տեխնիկա գնելու հնարաւորութիւնից:
«Ռոսօբորոնէքսպորտի» հետ միասին պատժամիջոցներ են կիրառուել
նաեւ որոշ արտասահմանեան ընկերութիւնների նկատմամբ: Մասնաւորապէս,
պետդեպարտամենտը արգելել է առեւտուրը Սուդանի, Չինաստանի,
Հիւսիսային եւ Հարաւային Կորեաների, Սիրիայի, ԱՄԷ-ի եւ
Վենեսուելայի մի քանի ֆիրմաների հետ: