ՄՈՍԿՈՒԱ, 20 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Լիբիայի կողմից
ռուսական զէնքի գնման գործարքների ընդհանուր գումարը կարող է
գերազանցել 2 մլրդ դոլարը: Այս մասին «Ինտերֆաքս» գործակալութեանը
յայտնել է ՌԴ պաշտպանական-արդիւնաբերական համալիրի ներկայացուցիչ:
«Սկզբունքային պայմանաւորուածութիւն աւելի քան 2 մլրդ դոլար
ընդհանուր արժողութեան զէնքի պայմանագրերի խոշոր փաթեթի կնքման
վերաբերեալ կարող է ձեռք բերուել Լիբիայի ղեկավար Մուամմար Քադաֆիի
Մոսկուա կատարելիք այցի ընթացքում, որը, ինչպէս սպասւում է, կկայանայ
հոկտեմբերի վերջին»,- ասել է աղբիւրը:
Ըստ նրա, Լիբիան շահագրգռուած է Ռուսաստանից գնել ժամանակակից
զենիթա-հրթիռային համակարգեր: Դրանից բացի, կցանկանար գնել երկու
էսկադրիլիա կործանիչներ` մէկական միգ-29ՍՄՏ եւ Սու-30ՄԿ, վեց
ուսումնա-մարտական Յակ-130 ինքնաթիռ, մի քանի տասնեակ Մի-17, Մի-35
եւ Կայ-52 ուղղաթիռներ, մօտ 50 Տ-90Ս տանկ, 636 նախագծի
դիզելա-էլեկտրական սուզանաւ, «Գրադ» համազարկային կրակի հրթիռային
համակարգեր եւ այլ սպառազինութիւն: