ՀՀ ՆՈՐ ԿԱՌԱՎԱՐՈՒԹԵԱՆ ԾՐԱԳԻՐԸ 21-ՐԴ ԴԱՐԻ ՏՆՏԵՍՈՒԹԵԱՆ
ԲՆՈՒԹԱԳԻՐ ՉԻ ՈՒՆԵՆԱՅ,- ԿԱՐԾՈՒՄ Է ՏՆՏԵՍԱԳԷՏ ԷԴՈՒԱՐԴ ԱՂԱՋԱՆՈՎԸ
01-05-2008 23:00:00 | Հայաստան | Տնտեսութիւն
ԵՐԵՎԱՆ, 1 ՄԱՅԻՍԻ, ՆՈՅԵԱՆ ՏԱՊԱՆ: ՀՀ նոր կառավարութեան
ծրագիրը 21 դարի տնտեսութեան բնութագիր չի ունենայ, քանի որ այնտեղ
առաջնային տեղը տրուած է հանքարդյունաբերությանը եւ լեռնային
մետալուրգիային: Նման կարծիք մայիսի 1-ի ասուլիսում յայտնեց
տնտեսագէտ Էդուարդ Աղաջանովը: Նա նշեց, որ միջազգային փորձագէտների
դիտարկումների համաձայն Հայաստանը դառնալու է կամ մարգինալ, կամ
մրցունակ երկիր: Վերջինիս հասնելու համար, ըստ տնտեսագետի, պէտք է
դասական, աւանդական տնտեսական կացութաձեւից անցում կատարել դէպի
ինովացիոն տնտեսական կացութաձեւի:
Է.Աղաջանովի խօսքերով, Հայաստանի նախագահը եւ վարչապետը
ընդհանրապես գաղափար չունեն երկրի իրական վիճակի մասին: Իսկ նման
վիճակում, ըստ նրա, անհեթեթութիւն է խօսել երկրի զարգացման,
տարածաշրջանում ֆինանսական, կրթական, առողջապահական կենտրոն
դառնալու մասին: «Մեր իշխանութիւնները շատ են սիրում հեքիաթներ:
Չգիտեն, որ դրան հասնելու համար ոչ թէ միլիոններ, այլ միլիարդներ
պէտք է ծախսուեն»,- ասաց տնտեսագէտը: Նրա խօսքերով, անիրատեսական է
խօսել նման բաների մասին այն դէպքում, երբ երկրում գոյութիւն
չունի ֆոնդային շուկայ, բանկային համակարգ:
«Ե՞րբ են մեր իշխանութիւնները լրջանալու, ե՞րբ են լուրջ
նայելու այս սարսափելի իրավիճակին. ընկել է երկրի
մրցունակությունը, արտահանման բաժինը ՀՆԱ-ի մէջ իջել է սարսափելի
ցածր թուի` 12,5%-ի, ինչը Հայաստանը երբեք չի ունեցել»,- ասաց
Է.Աղաջանովը:
Տնտեսագէտը նշեց նաեւ, որ Հայաստանի բիւջէի հարկային
մուտքերի 51,2%-ը կազմում է աւելացուած արժէքի հարկը (ԱԱՀ):
Մինչդեռ, ըստ նրա, 11 տարի առաջ ԱԱՀ-ն կազմում էր հարկային
մուտքերի ընդամէնը 30%-ը: Բացի այդ, նրա խօսքերով, այսօր 1996թ.-ի
համեմատ հարկային մուտքերի ընդհանուր ծաւալում նուազել է
եկամտահարկի եւ շահութահարկի բաժինը: «Որեւէ երկրում այդպիսի բան
չկայ: Պէտք է լիներ հակառակը: Դա նշանակում է, որ եթէ 1996թ.-ին
հարկային բեռը հիմնականում բիզնեսի վրայ էր, ապա հիմա այն ժողովրդի
վրայ է, քանի որ ԱԱՀ-ն վճարում է սպառողը»,- ասաց Է.Աղաջանովը:
Օրինակ, ըստ նրա, փաստորեն Հայաստանի բնակչութիւնը հաց գնելուց
պետութեանը որպէս ԱԱՀ աւելի շատ փող է մուծում, քան բոլոր
գործարարները միասին վերցուած` շահութահարկ: