«ՀԱՅՌՈՒՍԳԱԶԱՐԴ»-Ի ԿԱՆՈՆԱԴՐԱԿԱՆ ԿԱՊԻՏԱԼԸ 2009 Թ.-ԻՆ ԿԿԱԶՄԻ
ՇՈՒՐՋ 1 ՄԼՐԴ ԱՄՆ ԴՈԼԱՐ
16-04-2008 20:45:00 | Հայաստան | Տնտեսութիւն
ԵՐԵՎԱՆ, 16 ԱՊՐԻԼԻ, ՆՈՅԵԱՆ ՏԱՊԱՆ: Ներկայումս
«հայռուսգազարդ»-ը ակտիւ բանակցութիւններ է վարում Ռուսաստանի եւ
Իրանի հետ` Հայաստանի տարածքում նաւթավերամշակման գործարան
կառուցելու շուրջ: Ինչպէս ապրիլի 16-ի ասուլիսում յայտնեց
«հայռուսգազարդ»-ի վարչութեան նախագահ, գլխաւոր տնօրէն Կարեն
Կարապետեանը, էլէներգիայի արտահանման նպատակով բանակցութիւններ են
վարում նաեւ Վրաստանի, Իրանի եւ Թուրքմենստանի համապատասխան
ընկերութիւնների հետ: Ըստ նրա, ներկայումս շարունակւում են եւ այս
տարի կաւարտուեն Իրան-Հայաստան գազատարի Քաջարան-Արարատ հատուածի
շինհավաքակցման աշխատանքները: Դրանք իրականացւում են ընկերութեան
սեփական ուժերով` «հայռուսգազարդ»-ի բաժնետոմսերի լրացուցիչ
թողարկման միջոցների հաշուին, ինչը հնարաւորութիւն կտայ ապահովել
տարեկան 1,1-2,3 մլրդ խմ բնական գազի ծաւալի մատակարարման
հնարաւորութիւն:
Կ.Կարապետեանը նշեց, որ հաստատուել է 5 մլրդ դրամ (մօտ 16 մլն
ԱՄՆ դոլար) ընդհանուր ծաւալով կորպորատիվ պարտատոմսերի թողարկման
ծրագիրը, որը նախատեսւում է իրականացնել այս տարուայ առաջին
կիսամեակում: Ըստ նրա, 2009թ.-ին ընկերութեան կանոնադրական
կապիտալը կկազմի շուրջ 1 մլրդ ամն դոլար, իսկ շուկայական
կապիտալիզացիան` 1,5-2 մլրդ դոլար:
Կ.Կարապետեանը, ամփոփելով ընկերութեան վերջին եօթ տարիների
արդիւնքները, տեղեկացրեց, որ ՀՀ պետբիւջէ վճարումների ծաւալը
աճել է 11 անգամ, իսկ կենսաթօշակային հիմնադրամին վճարումների
ծաւալը` 7,5 անգամ: Հայաստան ներկրւող եւ իրացւող բնական գազի
ծաւալները աճել են աւելի քան 2 անգամ, իսկ փաստացի բաժանորդների
թիւը` 5,1 անգամ: Տարեկան ներդրումների ծաւալը 2 մլրդ դրամից աճել
է մինչեւ 48 մլրդ դրամը, իսկ այս տարի նախատեսւում է այդ թիւը
հասցնել 67,4 մլրդ դրամի: