«ԴԻԼԻՋԱՆ» ԱԶԳԱՅԻՆ ՊԱՐԿՈՒՄ ԱՅՍ ՏԱՐԻ ԿԳՈՐԾԵՆ ԵՎՍ ԵՐԿՈՒ
ԷԿՈՏՈՒՐԻՍՏԱԿԱՆ ԵՐԹՈՒՂԻՆԵՐ
29-02-2008 16:00:00 | Հայաստան | Տնտեսութիւն
ԵՐԵՎԱՆ, 29 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Մարտի վերջին կսկսուեն
«Դիլիջան» ազգային պարկի երկու էկոտուրիստական երթուղիների
(Դիլիջան-Պարզ լիճ` 10կմ, Պարզ լիճ-Գօշավանք` 8 կմ) վերականգնման
հիմնական աշխատանքները, որոնց շրջանակներում ուղղորդիչ եւ
տեղեկատուական նշաններ կտեղադրուեն էկոտուրիստական արահետների ողջ
երկայնքով, կկառուցուեն պիկնիկի վայրեր: Այս մասին «ՆՈՅԵԱՆ ՏԱՊԱՆ»-ի
թղթակցին յայտնեց «Դիլիջան» ազգային պարկի զարգացման ծրագրի
իրականացմանն աջակցող ԱՄՆ Միջազգային զարգացման գործակալութեան
«Մրցունակ մասնաւոր հատուած Հայաստանում» (ՄՄՀՀ) ծրագրի հանրային
կապերի համակարգող Արեւիկ Քյոխյանը:
Նրա խօսքերով, «Դիլիջան» ազգային պարկում էկոտուրիստական
երթուղիների վերականգնման աշխատանքներն սկսուել են 2007թ.-ից: Այդ
տարի ազգային պարկում վերականգնվել են եւս երկու երթուղիներ, որոնք
մաքրուել են եւ տեղադրուել են ուղղորդիչ նշաններով: Նշուեց, որ
«Դիլիջան»-ում կան բուսական եւ կենդանական աշխարհի աւելի քան 1 000
տարատեսակներ, բազմաթիւ պատմա-ճարտարապետական եւ հնէաբանական
յուշարձաններ, սակայն դեռ շատ անելիք կայ պարկը զբոսաշրջիկների
համար հրապուրիչ դարձնելու, այցելուներին բարձրորակ
ծառայութիւններ եւ ենթակառուցուածքներ առաջարկելու, զբոսավարների
պատրաստման առումով:
Ըստ Ա.Քյոխյանի, փետրուարի 28-ին 9 դիլիջանցի զբոսավարներ
հավաստագրվել են որպէս Զբոսավարների ասոցիացիաների համաշխարհային
ֆեդերացիայի (ԶԱՀՖ) չափանիշներին համապատասխանող զբոսավարներ:
Համապատասխան դասընթացները եւ հավաստագրումը կազմակերպուել են Հայ
զբոսավարների գիլդիայի եւ «Դիլիջան» ազգային պարկի կողմից` ՄՄՀՀ-ի
աջակցութեամբ: Զբոսավարներից չորսն արդէն աշխատանքի են անցել
ազգային պարկում: Դասընթացներին մասնակցել է 13 մարդ: