ՀՀ ԿԱՌԱՎԱՐՈՒԹԻՒՆԸ ՆԱԽԱՏԵՍՈՒՄ Է 2009 Թ.-ԻՆ ՄԵԾԱԾԱՒԱԼ
ՆԵՐԴՐՈՒՄՆԵՐ ԿԱՏԱՐԵԼ ՍՈՑԻԱԼԱԿԱՆ ՈԼՈՐՏՈՒՄ
24-10-2008 15:00:00 | Հայաստան | Տնտեսութիւն
ԵՐԵՎԱՆ, 24 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: ՀՀ կառավարութիւնը
աղքատութեան յաղթահարման, բնակչութեան կենսամակարդակի բարձրացման,
սոցիալական արդարութեան արմատաւորման, հասարակութեան
բեւեռուածութեան վերացման, գիտակրթական համակարգի արդիականացման,
կրթութեան մատչելիության ապահովման ռազմավարական ծրագրերի
ֆինանսաւորման նպատակով 2009 թուականին նախատեսում է մեծածաւալ
ներդրումներ իրականացնել: Այս մասին ՀՀ Ազգային Ժողովի մշտական
յանձնաժողովների հոկտեմբերի 24-ի համատեղ նիստում յայտնեց ՀՀ
վարչապետ Տիգրան Սարգսեանը` ներկայացնելով 2009թ. պետբիւջէի
նախագիծը:
Ըստ վարչապետի, կրթութեան ոլորտում ներդրումները կկազմեն
ՀՆԱ-ի 3 տոկոսը, սոցիալական ապահովութեան ոլորտում` 6,1 տոկոսը,
առողջապահութեան ոլորտում` 1,6 տոկոսը: Նշուած ոլորտներում պետական
ներդրումները, առանց կառավարման ապարատի պահպանութեան ծախսերի,
կկազմեն 441 մլրդ դրամ կամ 2008թ.-ի համադրելի մակարդակի նկատմամբ`
69 մլրդ դրամով աւելի, այսինքն, աճը կկազմի 18,5 տոկոս:
Կրթութեան ոլորտում պետբիւջէից ներդրումները 2009թ.-ին
ծրագրաւորուել են 126 մլրդ դրամի չափով կամ 2008թ.-ի համեմատ 23
մլրդ դրամով աւելի, աճը կազմում է 22,2 տոկոս: Ըստ Տ.Սարգսեյանի, դա
հնարաւորութիւն կընձեռի հանրակրթական ոլորտում բարձրացնել
մանկավարժական, վարչական, ուսումնաօժանդակ եւ տնտեսական անձնակազմի
միջին ամսական աշխատավարձերը: Մանկավարժական 1 դրոյքի հաշւով`
ներառեալ լրացուցիչ վարձատրությունները, աշխատավարձի մակարդակը
կհասցուի 116,3 հազար դրամի` ներկայիս մօտ 89,6 հազար դրամի դիմաց,
վարչական անձնակազմի միջին ամսական աշխատավարձը` 176 հազար դրամի
ներկայիս մօտ 136 հազար դրամի դիմաց:
Երկրորդ գերակայ ուղղութիւնը առողջապահութիւն է, որտեղ
պետբիւջէի ներդրումները 2009թ.-ին ծրագրաւորուել են 65 մլրդ դրամի
չափով կամ 2008թ.-ի համեմատ 11,5 մլրդ դրամով աւելի: Աճը կազմում է
աւելի քան 21 տոկոս: Առողջապահութեան ոլորտում հիմնական
գերակայութիւնը շարունակուելու է համարուել առաջնային
ամբուլատոր-պոլիկլինիկական բուժօգնութիւնը:
Ամբուլատոր-պոլիկլինիկական անվճար բուժօգնութեան ծաւալներում
կընդգրկուի ամբողջ ազգաբնակչութիւնը` անկախ տարիքից եւ սոցիալական
կարգավիճակից, բացառութեամբ ստոմատոլոգիական բուժօգնութեան, որն
անվճար է նախատեսւում իրականացնել միայն բնակչութեան սոցիալապէս
անապահով խմբերի, մինչեւ 8 տարեկան երեխաների, 65 տարեկան եւ աւելի
բարձր տարիքի տանձանց, ինչպէս նաեւ 12 տարեկան երեխաների համար:
Նախագծով նախատեսւում է առաջնային բուժօգնութիւն իրականացնող
բուժհաստատություններում բժշկական անձնակազմի աշխատակիցների
հաշուարկային միջին ամսական աշխատավարձերը հասցնել 93 հազար դրամի`
ներկայիս 77 հազար դրամի դիմաց, բուժանձնակազմի աշխատակիցներինը`
շուրջ 60 հազար դրամի` 49 հազար դրամի դիմաց, հիւանդանոցային
բուժօգնութիւն իրականացնող բուժհաստատություններում բժշկական
անձնակազմի աշխատակիցներինը` 66 հազար դրամի` 51 հազար դրամի
դիմաց, իսկ միջին բուջժանձնակազմի աշխատակիցներինը` 52 հազար դրամի
ներկայիս 40 հազար դրամի դիմաց:
3-րդ գերակայութիւնը սոցիալական պաշտպանութիւնն է, որտեղ
բիւջէի ներդրումները կկազմեն շուրջ 250 մլրդ դրամ` 2008թ.-ի
ծրագրային մակարդակի նկատմամբ աճելով 34 մլրդ դրամով կամ 16
տոկոսով: Ընտանեկան նպաստի համակարգում նպաստառու ընտանիքներին
տրուող միջին ամսական նպաստի չափը կկազմի 23,6 հազար դրամ` ներկայիս
21 հազար դրամի դիմաց, աճը կկազմի 12 տոկոս: 3 եւ աւելի երեխայ
ծնուելու կապակցութեամբ 2009թ.-ին իւրաքանչիւր երեխայի համար
միանուագ նպաստի չափը կկազմի 430 հազար դրամ` ներկայիս 300 հազար
դրամի (մօտ 1000 ԱՄՆ դոլար) դիմաց կամ 43 տոկոսով աւելի: Ընդ
որում, ըստ վարչապետի, այսուհետեւ այդ միջոցները ստանալու են ոչ
միայն սոցիալապէս անապահով, այլեւ բոլոր ընտանիքները:
Կենսաթոշակների գծով 2009թ.-ին նախատեսուել է 181 մլրդ դրամի
յատկացում կամ 2008թ.-ի համեմատ 15 տոկոսով աւելի: Աշխատանքային
կենսաթոշակների չափը 2009թ. կկազմի 25,5 հազար դրամ` 21,8 հազար
դրամի դիմաց, աճը կկազմի 17 տոկոս: 2009թ.-ին շարունակուելու է
«Խնայբանկի» աւանդների վերադարձման ծրագրի իրականացումը: Այդ
նպատակով 2009թ.-ին նախատեսուել է 1,6 մլրդ դրամի յատկացում`
2008թ.-ի 1,3 մլրդ դրամի դիմաց: