ՍԻՒՆԻՔԻ ՄԱՐԶՊԵՏԱՐԱՆՈՒՄ ԱՆՑԿԱՑՈՒԱԾ ՍՏՈՒԳՈՒՄՆԵՐԻ ԱՐԴԻՒՆՔՈՒՄ
ՀՀ ՎՊ-Ն ԸՆԴՀԱՆՈՒՐ ԱՌՄԱՄԲ ՅԱՅՏՆԱԲԵՐԵԼ Է 180,2 ՄԼՆ ԴՐԱՄԻ, ԻՍԿ
ՄԱՐԶԻ 23 ՀԱՄԱՅՆՔՆԵՐՈՒՄ` 394 ՄԼՆ ԴՐԱՄԻ ԽԱԽՏՈՒՄՆԵՐ
ՍԻՒՆԻՔԻ ՄԱՐԶՊԵՏԱՐԱՆՈՒՄ ԱՆՑԿԱՑՈՒԱԾ ՍՏՈՒԳՈՒՄՆԵՐԻ ԱՐԴԻՒՆՔՈՒՄ
ՀՀ ՎՊ-Ն ԸՆԴՀԱՆՈՒՐ ԱՌՄԱՄԲ ՅԱՅՏՆԱԲԵՐԵԼ Է 180,2 ՄԼՆ ԴՐԱՄԻ, ԻՍԿ
ՄԱՐԶԻ 23 ՀԱՄԱՅՆՔՆԵՐՈՒՄ` 394 ՄԼՆ ԴՐԱՄԻ ԽԱԽՏՈՒՄՆԵՐ
24-09-2008 19:30:00 | Հայաստան | Տնտեսութիւն
ԵՐԵՎԱՆ, 24 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: ՀՀ Վերահսկիչ պալատը
ընթացիկ տարուայ առաջին կիսամեակում Սիւնիքի մարզպետարանում
անցկացուած ստուգումների արդիւնքում յայտնաբերել է ընդհանուր
առմամբ 180,2 մլն դրամի, իսկ մարզի 23 համայնքներում` շուրջ 394
մլն դրամի չափով տարբեր բնոյթի խախտումներ: Այս մասին սեպտեմբերի
24-ի ասուլիսում յայտնեց ՎՊ-ի նախագահ Իշխան Զաքարյանը:
Ըստ նրա, մարզպետարանում յայտնաբերուած ֆինանսական խախտումների
ընդհանուր գումարից 94,5 մլն դրամը շինարարութեան ոլորտում
ծաւալային յաւելագրումներ են, 39,4 մլն դրամը` դռների,
լուսամուտների գների ուռճացման, իսկ 11,7 մլն դրամը` անորակ
ապրանքների տեղադրման հետեւանք: Գումարի մի մասն արդէն
վերականգնվել է բիւջէ գումարային եւ շինարարական աշխատանքների
տեսքով: Խօսքը այն աշխատանքների մասին է, որոնք չէին կատարուել,
սակայն դրանց դիմաց գումար էր դուրս գրուել:
Մարզի 109 համայնքներից ընտրանքային սկզբունքով 23-ում
անցկացուած ստուգումների արդիւնքում յայտնաբերուած խախտումների
շուրջ 394 մլն դրամի ընդհանուր գումարից 110 մլն դրամն առաջացել է
ջրի խողովակները չարդարացված ցածր գներով վաճառելու, իսկ 82 մլն
դրամը` ոչ բնակելի տարածքները կադաստրային գներից անհամեմատ ցածր
գներով օտարելու հետեւանքով: Մնացած գումարը կազմում են տեղական
տուրքերի, վարձակալութեան, բնակֆոնդի, կոմունալ, տաքսի եւ
գովազդային ծառայութիւնների վճարների, ինչպէս նաեւ հողի վաճառքի,
շինարարութեան մասով յայտնաբերուած խախտումները:
Ըստ Ի.Զաքարյանի, ստուգուած 23 համայնքների թւում են նաեւ
Կապան, Սիսիան, Գորիս քաղաքները, որոնցում, համապատասխանաբար,
յայտնաբերուել են 133 մլն դրամի, 47 մլն դրամի եւ 11 մլն դրամի
չափով խախտումներ: ՎՊ-ի նախագահը տեղեկացրեց, որ Սիւնիքի
համայնքներում յայտնաբերուած խախտումների ընդհանուր գումարից 38 մլն
դրամն արդէն վերականգնվել է բիւջէ գումարային տեսքով, եւս 10 մլն
դրամը` շինարարական աշխատանքների տեսքով: Գումարի մնացած մասը, ըստ
ժամանակացոյցի, պէտք է վերականգնուի ընթացիկ տարուայ հոկտեմբեր
ամսին: