2008 Թ.-Ի ԱՌԱՋԻՆ ԿԻՍԱՄԵԱԿՈՒՄ ՆԱԽՈՐԴ ՏԱՐՈՒԱՅ ՆՈՅՆ
ԺԱՄԱՆԱԿԱՀԱՏՈՒԱԾԻ ՀԱՄԵՄԱՏ ՀՀ ՊԵՏԲՈՒՅՒՋԵ ՄՈՒՏՔԱԳՐՈՒԱԾ ՇԱՀՈՒԹԱՀԱՐԿԻ
ԾԱՒԱԼՆ ԱՃԵԼ Է 24,5%-ՈՎ, ԻՍԿ ԵԿԱՄՏԱՀԱՐԿԻՆԸ` 23,9%-ՈՎ
2008 Թ.-Ի ԱՌԱՋԻՆ ԿԻՍԱՄԵԱԿՈՒՄ ՆԱԽՈՐԴ ՏԱՐՈՒԱՅ ՆՈՅՆ
ԺԱՄԱՆԱԿԱՀԱՏՈՒԱԾԻ ՀԱՄԵՄԱՏ ՀՀ ՊԵՏԲՈՒՅՒՋԵ ՄՈՒՏՔԱԳՐՈՒԱԾ ՇԱՀՈՒԹԱՀԱՐԿԻ
ԾԱՒԱԼՆ ԱՃԵԼ Է 24,5%-ՈՎ, ԻՍԿ ԵԿԱՄՏԱՀԱՐԿԻՆԸ` 23,9%-ՈՎ
16-08-2008 18:52:00 | Հայաստան | Տնտեսութիւն
ԵՐԵՎԱՆ, 16 ՕԳՈՍՏՈՍԻ, ՆՈՅԵԱՆ ՏԱՊԱՆ: 2008թ.-ի առաջին
կիսամեակում ՀՀ պետական բիւջէի հարկային եկամուտների 16,9%-ն
ապահովել է շահութահարկի հաշուին, որը կազմել է աւելի քան 46,5
մլրդ դրամ (մօտ 151,2 մլն ԱՄՆ դոլար): Նախորդ տարուայ նոյն
ժամանակահատուածի համեմատ շահութահարկի մուտքերն աճել են 24,5%-ով
կամ շուրջ 9,2 մլրդ դրամով, ինչը հիմնականում պայմանաւորուած է ոչ
պետական կազմակերպութիւնների, նուազագոյն շահութահարկի վճարման
պահանջից ելնելով` մէկ տոկոս դրոյքաչափով վճարումների, ինչպէս
նաեւ ֆինանսավարկային կազմակերպութիւնների վճարած շահութահարկի
աճով:
ՀՀ Ֆինանսների նախարարութեան լրատուական ծառայութեան
տուեալներով, 2008թ.-ի առաջին կիսամեակում ՀՀ պետական բիւջէ
մուտքագրուած եկամտահարկը կազմել է աւելի քան 23,8 մլրդ դրամ`
կազմելով հարկային եկամուտների 8,7%-ը: Այն 23,9%-ով կամ 4,6 մլրդ
դրամով գերազանցել է նախորդ տարուայ նոյն ժամանակահատուածի
ցուցանիշը: Աճի հիմնական աղբիւր են հանդիսացել աշխատանքային եւ
քաղաքացիաիրավական պայմանագրերի կատարումից ստացուած եկամուտները,
որոնք 4,3 մլրդ դրամով գերազանցել են նախորդ տարուայ համապատասխան
ցուցանիշը:
Այս տարուայ յունուար-յունիսին նախորդ տարուայ նոյն
ժամանակահատուածի համամետ զգալի աճ է արձանագրուել նաեւ մաքսատուրքի
գծով. այն կազմել է աւելի քան 15,4 մլրդ դրամ` 59,5%-ով կամ աւելի
քան 5,7 մլրդ դրամով գերազանցելով 2007թ.-ի առաջին կիսամեակի
ցուցանիշը: Ապահովել է պետական բիւջէի հարկային եկամուտների
5,6%-ը:
Գործունէութեան առանձին տեսակներից գանձուած հաստատագրուած
վճարները կազմել են շուրջ 9 մլրդ դրամ` 6,9%-ով կամ 577,9 մլն
դրամով գերազանցելով 2007թ.-ի առաջին կիսամեակի ցուցանիշը: Դա
հիմնականում պայմանաւորուել է տրանսպորտային միջոցների գազալցման,
առեւտրի իրականացման վայր կազմակերպելու, առեւտրի եւ հանրային
սննդի ոլորտներում գործունէութեան կազմակերպումից ստացուած մուտքերի
աճով: Միաժամանակ նուազել են տրանսպորտային գործունէութեան եւ
վիճակախաղերի կազմակերպման ոլորտներում աշխատող
կազմակերպություններից գանձուած գումարները:
2008թ.-ի առաջին կիսամեակում ՀՀ պետական բիւջէ է մուտքագրուել
շուրջ 3,3 մլրդ դրամ պարզեցուած հարկ: Նախորդ տարուայ նոյն
ժամանակահատուածի համեմատ այն նուազել է 27,8%-ով կամ 1,3 մլրդ
դրամով` պայմանաւորուած «Պարզեցուած հարկի մասին» ՀՀ օրէնքում
կատարուված փոփոխություններով: Դրանց համաձայն, 2008թ.-ի յունվարի
1-ից կրճատուել են պարզեցուած հարկով հարկւող գործունէութեան
տեսակները, ինչպէս նաեւ նախատեսուել են սահմանափակումներ առեւտրային
գործունէութիւն իրականացնող կազմակերպութիւնների եւ անհատ
ձեռնարկատէրերի համար: