ԱՌԱՋԻՆ ԿԻՍԱՄԵԱԿՈՒՄ ՀՀ ՊԵՏԲԻՒՋԷԻ ԵԿԱՄՈՒՏՆԵՐՆ ԱՃԵԼ ԵՆ
46,7%-ՈՎ, ԻՍԿ ԾԱԽՍԵՐԸ` 41,8%-ՈՎ
15-08-2008 20:46:00 | Հայաստան | Տնտեսութիւն
ԵՐԵՎԱՆ, 15 ՕԳՈՍՏՈՍԻ, ՆՈՅԵԱՆ ՏԱՊԱՆ: 2008թ.-ի առաջին
կիսամեակում ՀՀ պետական բիւջէի եկամուտները կազմել են աւելի քան
344,8 մլրդ դրամ (աւելի քան 1 մլրդ 121 մլն ԱՄՆ դոլար), իսկ
ծախսերը` 327,8 մլրդ դրամ, ինչով ապահովել է ՀՀ կառավարութեան
կողմից հաստատուած կիսամեակային ծրագրի, համապատասխանաբար, 103,2 եւ
86,4 տոկոսը: Պետական բիւջէի տարեկան ծրագրային ցուցանիշները
կատարուել են եկամուտների գծով` 46,7%-ով, ծախսերի գծով` 42,8%-ով:
ՀՀ Ֆինանսների նախարարութեան լրատուական ծառայութեան
տուեալներով, նախորդ տարուայ նոյն ժամանակահատուածի համեմատ պետական
բիւջէի եկամուտներն աւելացել են 25%-ով կամ շուրջ 69 մլրդ դրամով:
Ընդ որում, 71,9 մլրդ դրամով կամ 33,8%-ով աւելացել են հարկերը եւ
տուրքերը, 5,4 մլրդ դրամով կամ 13,2%-ով` պարտադիր սոցիալական
ապահովութեան վճարները, իսկ պաշտօնական դրամաշնորհները եւ այլ
եկամուտները (նախկինում` ոչ հարկային եկամուտներ) նուազել են,
համապատասխանաբար, 308,6 մլն դրամով (41,6%-ով) եւ 8 մլրդ դրամով
(61,5%-ով): Արդիւնքում եկամուտների կազմում 5,4%-ով աճել է
հարկերի եւ տուրքերի տեսակարար կշիռը, իսկ պարտադիր սոցիալական
ապահովութեան վճարների, պաշտօնական դրամաշնորհների եւ այլ
եկամուտների տեսակարար կշիռները նուազել են, համապատասխանաբար,
1,4%-ով, 0,1%-ով եւ 3,9%-ով:
Պետական բիւջէի եկամուտների 79,8%-ը ձեւաւորուել է հարկային
մուտքերի հաշուին: Պետական տուրքը կազմել է բիւջէի եկամուտների
2,9%-ը, պարտադիր սոցիալական ապահովութեան վճարները` 13,5%-ը,
պաշտօնական դրամաշնորհները` 0,1%-ը, այլ եկամուտները` 3,7%-ը:
«Հայաստանի Հանրապետութեան 2008 թուականի պետական բիւջէի
մասին» ՀՀ օրէնքի 9-րդ յօդուածի 18-րդ կէտին համապատասխան պետական
բիւջէում ներառվել են նաեւ պետական հիմնարկների արտաբիւջէտային
ֆոնդերի միջոցները, որոնց եկամուտները հաշուետու ժամանակահատուածում
կազմել են աւելի քան 7,6 մլրդ դրամ` նախորդ տարուայ 5,5 մլրդ դրամի
դիմաց: