ՄՇԱԿՒՈՒՄ Է ԱԶԳԱՅԻՆ ԾՐԱԳԻՐ` ՀԱՅԱՍՏԱՆՈՒՄ ՍՏՐԱՏԵԳԻԱԿԱՆ
ՆՇԱՆԱԿՈՒԹԻՒՆ ՈՒՆԵՑՈՂ ԱՐՏԱԴՐԱՏԵՍԱԿՆԵՐԻ ԻՆՔՆԱԲԱՒՈՒԹԻՒՆԸ
ԲԱՐՁՐԱՑՆԵԼՈՒ ՆՊԱՏԱԿՈՎ
17-07-2008 20:22:00 | Հայաստան | Տնտեսութիւն
ԵՐԵՎԱՆ, 17 ՅՈՒԼԻՍԻ, ՆՈՅԵԱՆ ՏԱՊԱՆ: Հայաստանում 3 անգամ աւելի
շատ պարենամթերք է ներկրւում, քան արտահանւում, ինչի հետեւանքով
միջազգային գների փոփոխութիւնը անմիջապէս իր ազդեցութիւնն է
ունենում երկրի տնտեսութեան վրայ: Այդ իսկ պատճառով, ինչպէս յուլիսի
17-ի ասուլիսում նշեց ՀՀ գիւղատնտեսութեան փոխնախարար Սամուէլ
Աւետիսեանը, առաջին հերթին անհրաժեշտ է աւելացնել սեփական
արտադրութեան ծաւալները, մասնաւորապէս, ստրատեգիական նշանակութիւն
ունեցող առանձին արտադրատեսակների գծով` պարենային ցորեն, շաքար,
բուսական իւղ, միս եւ այլն, որոնց ինքնաբաւութեան մակարդակը
ներկայումս հանրապետութիւնում զգալիօրէն ցածր է:
Ս.Աւետիսեանի խօսքերով, այսօրուայ դրութեամբ Հայաստանում
պարենային ցորենի ինքնաբաւութիւնը կազմում է 30-40%, բուսական
յուղինը` 5-6%, շաքարինը` 100%: Ըստ փոխնախարարի,
Գիւղնախարարութիւնը կառավարութեան յանձնարարութեամբ մշակում է
«Գիւղատնտեսութեան զարգացման եւ հիմնական պարենամթերքների գծով
ինքնաբաւութեան բարձրացման» ազգային ծրագիրը, որը հնարաւորութիւն
կտայ ինքնաբաւութեան մակարդակը հասցնել սահմանուած միջազգային
նորմերին` 75%-ի:
Ս.Աւետիսեանի կարծիքով, հանրապետութեան ցանքատարածությունների
125 հազ. հա-ի վրայ պէտք է կատարել առաջին հերթին ցորենի ցանքս,
ինչը կապահովի միջինը 3 տոննա բերքատուութիւն: Իսկ այդ արդիւնքին
հասնելու համար, ըստ փոխնախարարի, պէտք է լուծել ոռոգման խնդիրը,
բարձրացնել գարու եւ ցորենի սերմատվությունը: Նշուեց նաեւ, որ արդէն
կազմուել է ծրագիր, որի համաձայն նախատեսւում է մինչեւ 2011թ.-ը
հասնել սերմի ինքնաբաւութեան, եւ տեղում արտադրել ինչպէս էլիտային,
այնպէս էլ սուպեր էլիտային սերմեր: