ԵՐԵՒԱՆՈՒՄ ԿԱՅԱՑԱՒ ԱԶԳԱՅԻՆ ՄՐՑՈՒՆԱԿՈՒԹԵԱՆ ԱՌԱՋԻՆ ԶԵԿՈՅՑԻ
ՇՆՈՐՀԱՆԴԷՍԸ
16-07-2008 16:08:00 | Հայաստան | Տնտեսութիւն
ԵՐԵՎԱՆ, 16 ՅՈՒԼԻՍԻ, ՆՈՅԵԱՆ ՏԱՊԱՆ: Յուլիսի 16-ին կայացաւ
միջազգային եւ տեղական մասնագէտների աջակցութեամբ «Տնտեսութիւն եւ
արժէքներ» հետազոտական կենտրոնի կողմից կազմուած Հայաստանի Ազգային
մրցունակութեան զեկոյցի շնորհանդէսը: Այն պիտի նպաստի մասնաւոր եւ
հանրային հատուածների միջեւ Հայաստանի մրցունակութեան բարձրացմանը
միտուած ընդգրկուն երկխօսութեան կայացմանը: Զեկոյցում ներկայացուած
են Հայաստանի միջազգային մրցունակութեան դիրքը, վերջինի վրայ ազդող
գործօնները, նաեւ մատնանշուած են ՀՀ տնտեսական աճին եւ
բարեկեցութեան մակարդակի բարձրացմանն ուղղուած ռազմավարութեան
մշակմանն օժանդակող լծակները:
Նշելով , որ Համաշխարհային մրցունակութեան զեկոյցում 131
երկրների շարքում Հայաստանը ըստ Համաշխարհային մրցունակութեան
ցուցչի 93-րդ, իսկ ըստ Գործարար մրցակցութեան ցուցչի` 108-րդ
տեղում է, հեղինակները արձանագրում են, որ երկրի տնտեսական
ձեռքբերումները բաւականին համեստ են նաեւ ԱՊՀ, Կենտրոնական եւ
Արեւելյան Եւրոպայի, Մերձաւոր Արեւելքի երկրների համեմատութեամբ:
Ըստ հեղինակների, վերջին տասնամեակում երկրում գրանցուել է
տնտեսական աճի աննախադէպ բարձր տեմպ, որը զգալիօրէն կախուած է եղել
արտաքին գործօններից` դրամական փոխանցումներից, միջազգային
ֆինանսական եւ նուիրատու կազմակերպութիւնների օգնությունից: Սակայն
Հայաստանում կայուն եւ ներդաշնակ տնտեսական աճի ապահովման
հեռանկարը մեծապէս կախուած է երկրի մրցունակութեան մակարդակից:
ՀՀ էկոնոմիկայի նախարար Ներսէս Երիցյանի համոզմամբ, թիւ մէկ
մարտահրավերը տնտեսութեան մէջ, այդ թւում նաեւ առանձին ճիւղերում,
արտադրողականութեան որակական, արագ եւ համաչափ աճի ապահովումն է,
ինչն իր հերթին կնպաստի երկրում աշխատավարձերի աճին: Նա նշեց, որ
«ի տարբերութիւն նմանատիպ հաշվետվությունների, սա իրոք
շեշտադրումն անում է 21-րդ դարում արտադրողականութիւնը
աւելացնելու երկու կարեւորագոյն կոմպոնենտների վրայ»: Առաջինը, ըստ
նախարարի, զարգացման հետազոտություններն են, այսինքն, նոր
գաղափարների փնտրտուքը եւ դրանք աշխարհի լաւագոյն գաղափարների հետ
համադրումը: Երկրորդը` նոր գաղափարները ընդունելու եւ տնտեսութեան
մէջ իրագործելու ունակ լիդերների առկայութիւնն է ձեռներեցութեան
եւ բիզնեսի բնագաւառներում: