2008 Թ.-Ի ԱՌԱՋԻՆ ԿԻՍԱՄԵԱԿՈՒՄ ԵՐԵՒԱՆԻ ՔԱՂԱՔԱՊԵՏԱՐԱՆՆ
ԻՐԱԿԱՆԱՑՐԵԼ Է 83 ՄԼՐԴ 251 ՄԼՆ ԴՐԱՄԻ ԱՇԽԱՏԱՆՔՆԵՐ
14-07-2008 18:20:00 | Հայաստան | Տնտեսութիւն
ԵՐԵՎԱՆ, 14 ՅՈՒԼԻՍԻ, ՆՈՅԵԱՆ ՏԱՊԱՆ: 2008թ.-ի առաջին
կիսամեակում Երեւանի սոցիալ-տնտեսական բնագաւառում իրականացուել են
83 մլրդ 251 մլն դրամի (մօտ 277,5 մլն ԱՄՆ դոլար) աշխատանքներ կամ
նախատեսուածից 5,3%-ով աւելի: Ինչպէս յուլիսի 14-ի ասուլիսում
յայտնեց Երեւանի քաղաքապետ Երուանդ Զախարյանը, նշուած գումարից 50
մլրդ 924 մլն դրամի աշխատանքներ են կատարուել ՀՀ պետբիւջէի
միջոցներով, 2 մլրդ 751 մլն դրամի` համայնքային բիւջէների հաշուին:
Քաղաքապետի խօսքերով, նշուած ժամանակահատուածում շինարարութեան,
բարեկարգման եւ կոմունալ տնտեսութեան բնագաւառում կատարուել են 8
մլրդ 441 մլն դրամի աշխատանքներ, այդ թւում` երրորդ աստիճանի
վթարայնութեան 10 շէնքերի ամրացման, 17 փողոցների 30 կմ ընդհանուր
երկարությամբ արտաքին լուսաւորութեան ցանցի վերակառուցման,
մայրաքաղաքի փողոցների ասֆալտապատման եւ ճաքալցման աշխատանքներ:
Ե.Զախարյանը յայտնեց, որ մինչեւ տարեվերջ շահագործման կյանձնուեն 2
բնակելի շէնքեր, որոնք կառուցւում են 4-րդ աստիճանի վթարային
շէնքերի բնակիչների համար: Նշուեց նաեւ, յաջորդ տարի 4-րդ աստիճանի
վթարայնութեան 4 հանրակացարանների բնակիչների համար նույնպես
կկառուցուեն բազմաբնակարան շէնքեր:
Ըստ Ե.Զախարյանի, Տիգրան Մեծ եւ Խանջեան փողոցների
խաչմերուկում կառուցւող թունելի շինաշխատանքները կաւարտուեն յուլիսի
վերջին, Աբովեան պուրակից մինչեւ Մյասնիկյան պողոտայի թունելի
շինաշխատանքները` օգոստոսին, իսկ Սայաթ Նովա-Հերացի-Մյասնիկյան
փողոցների տրանսպորտային հանգոյցի (Գետառի հունի բետոնապատմամբ)
շինաշխատանքները` սեպտեմբերին:
Քաղաքապետը յայտնեց, որ առաջին կիսամեակում կրթութեան
բնագաւառում կատարուել են 1 մլրդ 200 մլն դրամի աշխատանքներ.
մասնաւորապէս մայրաքաղաքի հանրակրթական 62 դպրոցներում եւ 12
մանկապարտէզներում տեղադրուել են ջեռուցման համակարգեր: Ե.Զախարյանը
նշեց, որ մինչեւ 2010թ.-ը ամբողջութեամբ կաւարտուեն մայրաքաղաքի
դպրոցների եւ մանկապարտէզների վերանորոգման աշխատանքները: