ՁԻՀ-Ը ՁԵՌՔ Է ԲԵՐԵԼ ՀԱՄԱՇԽԱՐՀԱՅԻՆ ՃԱՆԱՉՈՒՄ,- ՅԱՅՏԱՐԱՐՈՒՄ Է
ԲԱԳՐԱՏ ԵՆԳԻԲԱՐՅԱՆԸ
09-07-2008 19:19:00 | Հայաստան | Տնտեսութիւն
ԵՐԵՎԱՆ, 9 ՅՈՒԼԻՍԻ, ՆՈՅԵԱՆ ՏԱՊԱՆ: Համաշխարհային բանկի
վարկային ծրագրի շրջանակներում որպէս ՏՏ ոլորտի
ձեռնարկութիւններին աջակցող գործակալութիւն հիմնադրուած եւ այժմ
ինքնուրոյն գործող «Ձեռնարկութիւնների ինկուբատոր» հիմնադրամը
(ՁԻՀ) ձեռք է բերել համաշխարհային ճանաչում: Ներկայումս այդ
կառոյցի աշխատանքի մոդելը փորձում են ընդօրինակել շատ երկրներում,
մասնաւորապէս, Իրանում եւ Ուկրաինայում, որտեղ ՁԻՀ-ի մասնագէտներն
սկսել են խորհրդատուական ծառայութիւնների մատուցումը: Այս մասին
յուլիսի 9-ի ասուլիսում յայտնեց ՁԻՀ-ի տնօրէն Բագրատ Ենգիբարյանը:
Նրա խօսքերով, նշուած մոդելի կիրառման նպատակով խորհրդատուական
աշխատանքներ անկացնելու հրաւէրներ են ստացուել Մերձաւոր Արեւելքի եւ
Հիւսիսային Աֆրիկայի երկրներից: ՁԻՀ-ի աշխատակիցներն իրենց փորձն
արդէն իսկ ներկայացրել են Բահրէյնում եւ Սիրիայում անցկացուած
համաժողովներում: Նախատեսւում է, որ յուլիսին ՁԻՀ-ի մասնագէտները
իրենց փորձը կներկայացնեն եւ խորդատվություն կտրամադրեն Թաիլանդի
մայրաքաղաք Բանգկոկում անցկացուելիք միջոցառման ժամանակ` նաեւ
Ինդոնեզիայի, Ֆիլիպինների եւ Վիետնամի մասնագէտների համար:
Ըստ Բ.Ենգիբարյանի, ՁԻՀ-ը այս տարի կանցկացնի ՏՏ ոլորտի ողջ
աշխարհում գործող ինկուբատորային կառոյցների վերլուծութիւնը, որի
հիման վրայ կներկայացուի, բացի ՁԻՀ-ի մոդելից, այլ մոդելների
արժէքաւորութեան մասին, եզրակացութիւն:
Ներկայումս ՁԻՀ-ի աշխատանքի հիմնական ուղղութիւնը ՏՏ
ոլորտում բիզնեսի զարգացումն է, մասնաւորապէս, հայրենական
ընկերութիւնների կարողութիւնների զարգացման եւ ծրագրաւորման
գործընթացների կառավարման ուղղութեամբ խորհրդատուական
ծառայութիւններ մատուցելով, ինչպէս նաեւ` բուհերի հետ համատեղ
ուսումնական ծրագրերի եւ կարճաժամկէտ դասընթացների անցկացումով:
Խօսքը վերաբերում է նաեւ ծրագրաւորման ընկերութիւններում CMM-CMMI
ստանդարտների ներդրմանը:
Երկրորդ ուղղությունն է` աշխատանքը միջազգային հեղինակաւոր
ընկերութիւնների հետ: Նշուեց, որ «Մայքրոսոֆթ»-ի եւ «Սան
Մայքրոսիսթեմզ»-ի հետ համագործակցութեան ծրագրերն ընթացքում են:
«Սան Մայքրոսիսթեմզ»-ի հետ համագործակցութեան արդիւնքում, յուլիսի
14-ին Հայաստանի պետական ճարտարագիտական համալսարանում կստորագրուի
Հայաստանի մի շարք բուհերում այդ ընկերութեան լաբորատորիաների
բացման մասին համաձայնագիր: Մէկ այլ ամերիկեան` «Նեյշնըլ
Ինսթրումենթզ», ընկերութեան հայաստանեան մասնաճիւղի մեկամյա յաջող
աշխատանքը նպաստել է նրան, որ Հայաստանում սկսել են վերապատրաստվել
նաեւ ճապոնացի մասնագէտներ: Ըստ նրա, այդ ընկերութեան աշխատանքի
ծաւալով երկրորդ հետազոտական լաբորատորիան, ԱՄՆ-ի լաբորատորայից
յետոյ, Հայաստանում է:
Նշուեց, որ ՁԻՀ-ը 50% բաժնեմաս է ձեռք բերել ՏՏ ոլորտի իր
աջակցութեամբ ստեղծուած ընկերութիւններում: Բաժնեմասերը ձեռք են
բերուել 30 հազարական դոլարի դրամաշնորհի տրամադրման ձեւով:
Յետագայում երկու ընկերութիւններում ՁԻՀ-ի բաժնեմասերը վաճառուել
են 20% եկամտաբերությամբ, ինչը վկայում է այդ ընկերութիւնների
հաջողակության մասին:
ՁԻՀ-ը կշարունակի նաեւ ՏՏ ոլորտի զարգացմանը խոչընդոտող
իրաւական դաշտի խնդիրների ուսումնասիրությունները:
Նշուեց նաեւ, որ ՁԻՀ-ը կաջակցի Զարգացման հայկական
գործակալութեանը Համաշխարհային բանկի դրամաշնորհային «Արտաքին
ներդրումների եւ արտահանման խթանման երկրորդ ծրագրի»
շրջանակներում: ՁԻՀ-ի աջակցութիւնը կիրականացուի տեղեկատուական
տեխնոլոգիաների ոլորտի զարգացման հարցերում: