2008 Թ. ՅՈՒՆՈՒԱՐ-ՄԱՅԻՍԻՆ ՆԱԽՈՐԴ ՏԱՐՈՒԱՅ ՆՈՅՆ ԺԱՄԱՆԱԿԱՀԱՏՈՒԱԾԻ
ՀԱՄԵՄԱՏ ՀԱՅԱՍՏԱՆՈՒՄ ՇԻՆԱՐԱՐՈՒԹԵԱՆ ԾԱՒԱԼԸ 14,9%-ՈՎ ԱՃԵԼ Է
08-07-2008 21:12:00 | Հայաստան | Տնտեսութիւն
ԵՐԵՎԱՆ, 8 ՅՈՒԼԻՍԻ, ՆՈՅԵԱՆ ՏԱՊԱՆ: 2008թ.-ի յունուար-մայիսին
Հայաստանում իրականացուել է 135 մլրդ 318,7 մլն դրամի (մօտ 439,2
մլն ԱՄՆ դոլար) շինարարութիւն, այդ թւում շինմոնտաժային
աշխատանքները կազմել են 115 մլրդ 990,5 մլն դրամ: 2007թ.-ի
յունուար-մայիսի համեմատ շինարարութեան ծաւալը, համադրելի գներով,
աճել է 14,9%-ով, իսկ շինմոնտաժային աշխատանքներինը` 18,1%-ով:
ՀՀ Ազգային վիճակագրական ծառայութեան տուեալներով,
շինարարութեան 9,4%-ն իրականացուել է պետբիւջէի, 0,2%-ը`
համայնքների միջոցների, 1,4%-ը Համաշխարհային բանկի, 3,5%-ը`
մարդասիրական օգնութեան, 38,8%-ը մասնաւոր կազմակերպութիւնների,
46,7%-ը` բնակչութեան միջոցների հաշուին: