ԵՐԵՎԱՆ, 8 ՅՈՒԼԻՍԻ, ՆՈՅԵԱՆ ՏԱՊԱՆ: «Արմաւիա» ընկերութիւնը
յուլիսի 5-ից սկսեց իրականացնել նոր` Երեւան-Մարսել-Երեւան,
չուերթը: Այն կկատարուի շաբաթը մէկ անգամ` շաբաթ օրերին: Ինչպէս նշեց
ընկերութեան տնօրէն Նորայր Բելլույանը, «Արմաւիա»-ն բացեց այս
չուերթը` հաշուի առնելով ամառուայ սեզոնին Ֆրանսիայի հարաւային
յատուածում ապրող սփիւռքահայերի Հայաստան այցելելու մեծ
ցանկութիւնը: Նախատեսուած է, որ չուերթը կգործի յուլիս-սեպտեմբեր
ամիսներին, սակայն պահանջարկի դէպքում` կունենայ շարունակական
բնոյթ:
Ֆրանսիայում «Արմաւիա»-ի ներկայացուցիչ Լեւոն Բաղդասարեանը
տեղեկացրեց, որ Մարսել քաղաքը իր շրջակայքով մինչեւ Վալանս քաղաքը
հայկական մեծ` 250-300 հազարանոց, գաղութ ունի, որոնք յաճախ են
այցելում Հայաստան: Ըստ նրա, առաջին չուերթն արդէն խօստումնալից է,
քանի որ աւելի քան 100 ուղեւոր ժամանեց Հայաստան, եւ ինքնաթիռը
ծանրաբեռված էր 75%-ով, իսկ յաջորդ չուերթների տոմսերի մեծ մասն
արդէն վաճառուած է: Լ.Բաղդասարեանի կարծիքով, նոր չուերթը ոչ միայն
կխթանի զբոսաշրջիկների այցերը Հայաստան, այլեւ կնպաստի Հարաւային
Ֆրանսիայի սփիւռքահայութեան եւ Հայաստանի յարաբերութիւնների
զարգացմանը:
Ն.Բելլույանը տեղեկացրեց, որ այս տարի արդէն բացուել են
չուերթներ դէպի Ռիգա եւ Աստրախան քաղաքներ: Նշուեց, որ առաջիկայում
նախատեսւում է բացել չուերթներ դէպի Խարկով եւ Զապարոժիե քաղաքներ:
Բացի այդ, ընկերութիւնը բանակցութիւններ է վարում
Երեւան-Լոս Անջելէս-Երեւանի չուերթի բացման ուղղութեամբ: Չուերթը
լինելու է ուղիղ` առանց կանգառի, մօտ 14 ժամ տեւողությամբ: Այդ
չուերթի իրականացման համար «Արմաւիա»-ն մտադիր է գնել նոր Ա-340
ինքնաթիռ: Ի դէեպ, այդ ինքնաթիռը նախատեսւում է շահագործել նաեւ
դէպի Հնդկաստան, Չինաստան եւ Թայլանդ չուերթների իրականացման համար:
«Արմաւիա»-ն ներկայումս չուերթներ է իրականացնում մօտ 40
ուղղութիւններով: Անցած տարի ընկերութիւնը տեղափոխել է 572 հազար
ուղեւոր:
«Արմաւիա»-ի ինքնաթիռային պարկը կազմուած է երկու Ա-319,
Ա-320, Յակ-42, Բոինգ-737, Իլ-86 եւ CRJ-100 ինքնաթիռներից:
2009թ.-ին նախատեսւում է ձեռք բերել նոր Ա-319 ինքնաթիռ: Իսկ այս
տարեվերջին ներկայումս շահագործւող Ա-320-ը կփոխարինվի նոյն
մակնիշի նոր օդանավով, եւ այդպիսով «Արմաւիա»-ի ինքանթիռային պարկը
համալրուած կլինի միայն նոր ինքնաթիռներով: