2008 Թ. ԱՌԱՋԻՆ ԿԻՍԱՄԵԱԿՈՒՄ ՀԱՅԱՍՏԱՆՈՒՄ ՊԱՐԵՆԱՅԻՆ ԱՊՐԱՆՔՆԵՐԻ
ԳՆԵՐԸ 7,3%-ՈՎ ԱՃԵԼ ԵՆ
03-07-2008 02:20:00 | Հայաստան | Տնտեսութիւն
ԵՐԵՎԱՆ, 3 ՅՈՒԼԻՍԻ, ՆՈՅԵԱՆ ՏԱՊԱՆ: 2008թ.-ի յունիսին նախորդ
տարուայ դեկտեմբերի համեմատ Հայաստանում արձանագրուել է պարենային
ապրանքների 7,3% գնաճ, իսկ 2008թ.-ի մայիսի համեմատ` 1,4%
գնանկում:
ՀՀ Ազգային վիճակագրական ծառայութեան տուեալներով, դիտարկուող
պարենային 13 ապրանքախմբերից 5-ում 2008թ.-ի յունիսին մայիսի
համեմատ արձանագրուել է 12,2-0,2% գնանկում, իսկ միւս 8
ապրանքախմբերում` 0,2-5,5% գնաճ: Ձկնամթերքի ապրանքախմբում
արձանագրուել է 12,2% գնանկում, ինչը հիմնականում պայմանաւորուել է
թարմ «սիգ» տեսակի ձկան 13,8% գնանկումով:
2008թ.-ի յունիսին մայիսի համեմատ բանջարեղէնի եւ կարտոֆիլի
գները նուազել են 9,8%-ով, իսկ 2007թ.-ի յունիսի համեմատ` 22,7%-ով:
2008թ. յունիսին մայիսի համեմատ հանրապետութիւնում արձանագրուել է
կանաչ լոբու 58%, կանաչ պղպեղի 46,8%, լոլիկի 38,7%, խառը
կանաչեղենի 27,2%, սմբուկի 24,9%, վարունգի 19,7%, գլուխ սոխի 2,3%
գնանկում: Դրան զուգընթաց, գազարի գինն աճել է 2,1 անգամ,
ճակնդեղինը` 2,4 անգամ, կաղամբինը` 1,8 անգամ, կարտոֆիլինը` 6%-ով,
սխտորինը` 5,7%-ով:
Մրգի ապրանքախմբում 2008թ.-ի յունիսին մայիսի համեմատ
արձանագրուել է 9,5%, իսկ 2007թ.-ի յունիսի համեմատ` 11,3%
գնանկում:
Ձուի միջին հանրապետական գինը 2008թ.-ի յունիսին մայիսի
համեմատ նուազել է 3,7%-ով, կաթնամթերքին` 0,2%-ով, ոգելից խմիչքի
եւ ծխախոտինը` 0,1%-ով: Այլ մթերքի ապրանքախմբում 2008թ.-ի
յունիսին 2007թ.-ի յունիսի համեմատ գրանցուել է 14,5%, իսկ 2008թ.-ի
մայիսի համեմատ` 4% գնաճ: Վերջինս հիմնականում պայմանաւորուել է աղի
4,7%, սեւ պղպեղի 6,7%, սննդի սոդայի 9% թանկացմամբ:
2008թ.-ի յունիսին մայիսի համեմատ հանրապետութիւնում
արձանագրուել է ոչ ոգելից խմիչքի 5,5% գնաճ, ինչը հիմնականում
«Ջերմուկ» հանքային ջրի (ապակեայ շշերով) 12,8% թանկացման արդիւնք
է:
Հացամթերքի ապրանքախմբում 2008թ.-ի յունիսին 2007թ.-ի յունիսի
համեմատ արձանագրուել է 36,1%, իսկ 2008թ.-ի ապրիլի համեմատ` 0.9%
գնաճ: Վերջինիս մեծապէս նպաստել է բրնձի 9,1%, ցորենի` 5% գնաճը:
Սուրճի, թեյի, կակաոյի ապրանքախմբում 2008թ.-ի յունիսին
2007թ.-ի յունիսի համեմատ գրանցուել է 18,5%, իսկ 2008թ.-ի մայիսի
համեմատ` 2,1% գնաճ: Վերջինս հիմնականում պայմանաւորուել է սուրճի
4,4% գնաճով:
2008թ.-ի յունիսին 2007թ.-ի յունիսի համեմատ մսամթերքի
ապրանքախմբում արձանագրուել է 5,9%, իսկ 2007թ.-ի մայիսի համեմատ
0,4% գնաճ: Տաւարի, խոզի եւ ոչխարի մսի գները 2008թ.-ի յունիսին
մայիսի համեմատ թանկացել են, համապատասխանաբար, 0,3%, 0,5 եւ
9,9%-ով:
Հրուշակեղէնի, կենդանական եւ բուսական իւղի, շաքարաւազի
ապրանքախմբերում 2008թ.-ի յունիսին մայիսի համեմատ գրանցուել է
0,2-0,9% գնաճ: