ԱՄԵՐԻԿԱՑԻ ՍԵՆԱՏՈՐԸ ՊՆԴՈՒՄ Է, ՈՐ ՌՈՒՍԱՍՏԱՆԸ ՆԱՏՕ-Ի ՎՐԱՅ
ՆԵՐԱԶԴՈՒՄ Է ԻՐ ԷՆԵՐԳԱՊԱՇԱՐՆԵՐՈՎ
09-04-2008 18:40:00 | ԱՄՆ | Միջազգային
ՎԱՇԻՆԳՏՈՆ, 9 ԱՊՐԻԼԻ, ՆՈՅԵԱՆ ՏԱՊԱՆ: Ռուսաստանը կարող է ազդել
ՆԱՏՕ-ի որոշումների վրայ, եւ նա արդէն իսկ օգտվեց նման
հնարաւորութիւնից դաշինքի կողմից Ուկրաինայի եւ Վրաստանի հարցի
քննութեան ժամանակ: Այս մասին, ինչպէս հաղորդում է «Վզգլյադ»
թերթը, յայտարարել է ամերիկացի յայտնի հանրապետական սենատոր,
Սենատի արտաքին գործերի յանձնաժողովի նախագահի տեղակալ Ռիչարդ
Լուգարը:
«Ես այն եզրակացութեան եմ հանգել, որ Գերմանիայի
առարկութիւնները ՆԱՏՕ-ի անդամութեան գործողութիւնների ծրագրին
Ուկրաինայի եւ Վրաստանի միանալու դէմ մեծապէս կապուած էին
Ռուսաստանի եւ էներգետիկայի հետ»,- յայտարարել է Լուգարը ԱՄՆ-ի
Սենատի լսումների ժամանակ:
Ընդգծելով, որ «ՆԱՏՕ-ի որոշ անդամներ ներկայումս կախուած են
Ռուսաստանից իրենց էներգետիկայի ոլորտում», Լուգարը արծարծել է այն
հարցը, թէ արդեօք դրանով իսկ Ռուսաստանը հնարաւորութիւն չի ստացել
արգելափակելու ՆԱՏՕ-ի որոշումները. «Արդեօ՞ք Ռուսաստանին իր
էներգետիկ պաշարները ՆԱՏՕ-ի գործողութիւնների վրայ վետոյի փաստացի
իրաւունք չեն տրամադրում»,- ասել է Լուգարը: