«ՀԱՅԱՍՏԱՆ» ՀԱՄԱՀԱՅԿԱԿԱՆ ՀԻՄՆԱԴՐԱՄԸ ՍԿՍԵԼ Է ԱՆԱՍՆԱԲՈՒԺԱԿԱՆ
ԾԱՌԱՅՈՒԹԵԱՆ ԲԱՐԵԼԱՒՄԱՆ ԾՐԱԳԻՐ
23-01-2008 22:00:00 | Հայաստան | Տնտեսութիւն
ԵՐԵՎԱՆ, 23 ՅՈՒՆՎԱՐԻ, ՆՈՅԵԱՆ ՏԱՊԱՆ: «Հայաստան» համահայկական
հիմնադրամի Գիւղական զարգացման ծրագիրը յայտարարում է Տաւուշի
մարզի սահմանամերձ վեց գիւղերում անասնաբուժական ծառայութեան
բարելաւման ծրագրի մեկնարկը: Ինչպէս յայտնել են Հիմնադրամի`
Հասարակայնութեան հետ կապերի բաժնից, այս գիւղերը ընդգրկուած են
Ծրագրի փորձնական միկրոշրջանում: Ծրագիրը կիրականացուի
«Ռազմավարական զարգացման գործակալութիւն» հասարակական
կազմակերպութեան կողմից, Շվեյցարիայի Զարգացման եւ
համագործակցութեան գործակալութեան եւ Իզմիրլեան հիմնադրամի
աջակցութեամբ:
Յայտնւում է, որ անասնաբույժերի եւ վեց համայնքների
բնակիչների համար վերապատրաստման դասընթացներին զուգահեռ այս
ծրագիրը բժշկական սարքաւորումներ եւ դեղամիջոցներ կապահովի
անասնաբուժական կէտերի համար: Հովանավորման մեկամյա փուլից յետոյ
ծառայութիւնը կաշխատի համայնքի բնակիչների ամենամսեայ վճարումների
միջոցով: Դրանք կազմում են գիւղացու` մարզկենտրոններից գնուող
դեղամիջոցների վրայ ծախսւող գումարի փոքր մասը: Ամենամսեայ
վճարումները անասնաբոյժի համար կապահովեն նաեւ կայուն եկամուտ:
«Հայաստան» համահայկական հիմնադրամը շահոյթ չհետապնդող
կազմակերպութիւն է, որը հիմնադրուել է 1992թ-ին եւ կոչուած է
խթանելու մարդասիրական օգնութիւնը եւ ենթակառուցուածքների
զարգացումը ՀՀ-ում եւ ԼՂՀ-ում: Հիմնադրամն ունի տեղական մարմիններ
աշխարհի 19 երկրներում: