ՅՈՒՆՎԱՐԻ 18-ԻՆ «Հ1»-Ի ՈՒՂԻՂ ԵԹԵՐՈՎ ԿՀԵՌԱՐՁԱԿՎԻ
ԵՐԵՎԱՆ-ՄՈՍԿՈՒԱ-ՇՈՒՇԻ-ԲԵԹՂԵՀԵՄ ՀԵՌՈՒՍՏԱԿԱՄՈՒՐՋԸ
16-01-2008 19:00:00 | Հայաստան | Հասարակութիւն
ԵՐԵՎԱՆ, 16 ՅՈՒՆՎԱՐԻ, ՆՈՅԵԱՆ ՏԱՊԱՆ: «Շուշի վերածնունդ»
հիմնադրամի նախաձեռնութեամբ յունվարի 18-ին կկայանայ
Երեւան-Մոսկուա-Շուշի-Բեթղեհեմ հեռուստակամուրջը, որի հեռարձակումը
Հայաստանի հանրային հեռուստատեսութեան եթերով կսկսուի ժամը
21:30-ին: Ինչպէս «ՆՈՅԵԱՆ ՏԱՊԱՆ»-ի թղթակցին յայտնեց հիմնադրամի
հանրային կապերի պատասխանատու Մարինա Գրիգորեանը, այդ օրը
պատահական չէ ընտրուած. բազմաթիւ հայեր Սբ.Ծնունդը նշում են հին
տոմարով` յունվարի 18-ին, իսկ նրանցից շատերը այդ օրը մասնակցում
են Բեթղեհեմի տաճարում մատուցւող պատարագին:
Մ.Գրիգորեանի խօսքերով, ուղիղ հեռուստակամուրջի ժամանակ
ՌԴ-ում Հայաստանի դեսպանատանը եւ Երեւանի քաղաքապետարանում
հաւաքուած մշակոյթային գործիչները կը խօսեն Շուշիի վերածննդի եւ
զարգացման կարեւորութեան մասին: Հեռուստակամուրջի ընթացքում
կցուցադրուեն տեսանիւթեր, որոնք կպատմեն ժամանակին մշակոյթային եւ
հոգեւոր կենտրոն հանդիսացող Շուշիի, ինչպէս նաեւ հիմնադրամի
իրականացրած ծրագրերի մասին: