ՑԵՂԱՍՊԱՆՈՒԹԻՒՆԸ ԵՎ ՀՈԼՈՔՈՍՏԸ ՀԵՐՔՈՂՆԵՐԻՆ ՊԷՏՔ Է
ԴԱՏԱՊԱՐՏԵԼ ԵՎ ՈՉ ԹԷ ՊԱՏՎԵԼ
13-11-2007 19:45:00 | ԱՄՆ | Յօդուածներ
Յարութ Սասունեան
«Կալիֆոռնիան Կուրիեր»-ի հրատարակիչ
Խօսք չկայ, որ ցեղասպանութիւնը հերքողներին պէտք է մեղադրել
եւ ոչ թէ յարգանքի արժանացնել: Այս հարցում չպէտք է լինեն որեւէ
բացառութիւններ կամ երկակի ստանդարտներ: Այնուամենայնիւ,
պարբերաբար կարելի է հանդիպել արտառոց իրավիճակների, երբ ոչ այլ
ոք, քան Հոլոքոստի հերքումը դատապարտողները ցեղասպանութիւնը
հերքողներին պարսավելու փոխարէն պարգեւատրում են նրանց:
Անցեալ ամիս Իրանի նախագահ Մահմուդ Ահմադինեժադը այցելեց
Հայաստան` քննարկելու երկկողմանի առեւտրի հարցերը եւ
ուսումնասիրելու երկու երկրների կողմից իրականացyող հիմնական
ծրագրերը: Հայաստանի ղեկավարների հետ հանդիպումից յետոյ Իրանի
նախագահը այցելեց Երեւանի պետական համալսարան (ԵՊՀ), որտեղ
կարճատեւ զրույց ունեցաւ ուսանողների հետ եւ պատասխանեց նրանց
հարցերին: Նա զգուշորեն շրջանցեց Հայոց ցեղասպանութեան հիմնահարցը`
պարզապէս յայտարարելով, որ Իրանը դատապարտում է մարդկութեան դէմ
բոլոր ոճիրները: Բոլոր հիւր եկած պետութեան ղեկավարների համար
սահմանուած կարգին հետեւելով` ԵՊՀ-ի ղեկավարները Ահմադինեժադին
հնազանդորեն շնորհեցին պատուաւոր դոկտորի կոչում եւ ոսկէ մեդալ:
Ակնյայտօրէն, համալսարանից ոչ ոք իրեն նեղութիւն չտուեց
ինքնուրոյն գնահատելու, թէ արդեօք այցով ժամանած բարձրաստիճան
պաշտօնեան արժանի՞ էր այդ պատիվներին թէ՞ ոչ: 2006թ. հոկտեմբերին,
երբ Ռումինիայի նախագահը այցելեց Երեւան, նրան ԵՊՀ-ն նույնպես
շնորհեց պատուաւոր դոկտորի կոչում ու ոսկէ մեդալ, նոյնիսկ այն
բանից յետոյ, երբ համալսարանի ուսանողներին ասաց, որ պատրաստ չէ
ճանաչելու Հայոց ցեղասպանութիւնը, որպէսզի չկործանի Թուրքիայի
հետ իր երկրի բարեկամական յարաբերութիւնները:
Անցեալ ամիս, այն բանից յետոյ, երբ ԵՊՀ-ն հիւրընկալեց
Ահմադինեջադին, հրեական տարբեր խմբեր հայկական համալսարանին
մեղադրեցին Իրանի նախագահին` Հոլոքոստի այդ տխրահռչակ հերքողին,
պատուի արժանացնելու համար:
Հայաստանում հրեական համայնքի նախագահ Ռիմա Վարժապետեանը
առաջինն էր, որ քննադատեց ԵՊՀ-ին: Ի տարբերութիւն
ամերիկեան-հրեական որոշ խմբերի` նա լիովին իրաւունք ունի այդ
անելու, քանի որ չի կիրառում երկակի ստանդարտներ: Հիրաւի, տկն.
Վարժապետեանը պատշաճ կերպով եւ հաւասարապէս դատապարտում է թէ
ցեղասպանութեան ու թէ Հոլոքոստի բոլոր հերքողներին: Հետեւաբար, նա
վաստակել է բարոյական իրաւունք` քննադատելու այդօրինակ անարդարացի
արարքը իր հայրենակից հայերի կողմից: Այլ հրեական խմբեր,
այնուամենայնիւ, իրենց զրկել են այդ իրաւունքից: Ե'վ Ամերիկայի
հրեական համայնքը, ե'ւ Ընդդէմ վարկաբեկման լիգան (ADL) անցեալ
շաբաթ տարածեցին յայտարարութիւններ, որոնք դատապարտում էին ԵՊՀ-ն
Ահմադինեջադին պատվելու համար: Ամերիկայի հրեական համայնքի կողմից
վերին աստիճանի անպարկեշտ եւ անբարոյ է քննադատել ԵՊՀ-ն` նկատի
ունենալով այն, որ Ամերիկայի հրեական համայնքը հրաժարուեց Հայոց
ցեղասպանութիւնը ճանաչելուց, ինչպէս նաեւ Թուրքիայի ժխտողական
վարչակարգի հետ դրա համագործակցութիւնը: Սա երկակի ստանդարտի
հրաշալի օրինակ է: Ապակէ տներում ապրողները չպէտք է քար նետեն
ուրիշների վրայ: Ամերիկայի հրեական համայնքի ղեկավարները կորցրել են
Հոլոքոստը հերքելու մասին որեւէ մէկին խրատ կարդալու բարոյական
իրաւունքը: Այդ պատճառով ԵՊՀ-ին ուղղուած նրանց քննադատությունը չի
կարող լուրջ ընդունուել:
ADL-ի ազգային տնօրէն Աբրահամ Ֆոքսմանի դիրքորոշումը է'լ
աւելի եկիմաստ է: Երկար տարիներ Հայոց ցեղասպանութեան ճանաչումից
հրաժարուելուց յետոյ Ֆոքսմանը վերջերս Բոստոնի տարածքի ազդեցիկ եւ
արդարամիտ հրեայ առաջնորդների կողմից պարտադրուեց տարածել մի
յայտարարութիւն, որը պարունակում էր յիշատակում Հայոց
ցեղասպանութեան մասին: Է'լ աւելի անակնկալ է այն փաստը, որ
Ֆոքսմանը համարձակվեց քննադատել ԵՊՀ-ին Ահմադինեժադին պատվելու
համար, մինչդեռ նա ինքը 2005թ.-ին կազմակերպութեան Նյու Եորքի
կենտրոնակայանում Թուրքիայի վարչապետ եւ Հայոց ցեղասպանութեան
ժխտող Ռեջեփ Թայիփ Էրդողանին շնորհեց ADL-ի «Courage to Care
Award» մրցանակը:
Ուշագրաւ է, որ հրեական համայնքի որոշ անդամներ անյապաղ
քննադատեցին Ֆոքսմանի գործողութիւնները: Բերկլիից (Կալիֆորնիա)
ընթերցող Մոլլի Ֆրիմենը «The Forward»-ի խմբագրին ուղարկեց մի
նամակ, որով խստօրէն դատապարտում էր ADL-ին Էրդողանին մրցանակ
շնորհելու համար:
«ADL-ը երեսպաշտություն է անում Թուրքիայի վարչապետին պատուի
արժանացնելով» վերնագիրը կրող իր նամակում Ֆրիմանը գրել էր. «ADL-ի
մրցանակը այն պետութեան ղեկավարին, որը հրաժարվում է
պատասխանատւութիւն կրել իր սեփական 1,5 մլն հայ քաղաքացիներին
բնաջնջելու համար, այնքան արտասովոր է, որ ես հաւատում եմ, որ
ADL-ը նպաստում է հակասեմիտականությանը: Ի՞նչը կարող է աւելի
կեղծավոր եւ հակահրեական նախապաշարմունքների համար աւելի նպաստաւոր
լինել, քան ցեղասպանութիւնը հերքողին պատուի արժանացնելը: ADL-ը
աշխարհը հրեաների համար ապահով չի դարձնում, այն աւելի շատ
նպաստում է մեր անպաշտպանուածութեանը եւ մեր բարոյական
աւանդոյթների խզմանը: Ես կցանկանայի, որ ADL-ը լրջութեամբ
վերաբերվեր Հիլլելի բառերին. «Քո հարեւանին մի արա այն, ինչն ատելի
է քեզ համար»: Սա է ամբողջ Թորան, մնացեալը մեկնութիւններ են:
Էրդողանին մրցանակ շնորհելու հարցում ADL-ը փաստորեն մերժում է
ռաբիական օրէնքի անկիւնաքարը, քանի որ անարգում է իր
հարեւաններին` հայերին: Էրդողանին պարգեւատրելով` այն անում է մի
բան, որը երբեք հաւանութեան չէր տայ, որ կատարուեր հրեաների
նկատմամբ»: Նոյնպիսի ամօթալի երկակի ստանդարտ կիրառեց հրեական մէկ
այլ խումբ եւս` Ամերիկայի հրեական կոնգրեսը, որը 2004թ.-ին
Էրդողանին պատվեց` Նյու Յորքում նրան շնորհելով իր «Profiles in
Courage» մրցանակը:
Ամերիկահայ երկու թերթ` «Armenian Weekly»-ն եւ «Armenian
Reporter»-ը, անցեալ շաբաթ իրենց խմբագրականներում իրաւացիօրէն
քննադատեցին ԵՊՀ-ն Ահմադինեժադին մրցանակ շնորհելու համար:
Այնուամենայնիւ, երկու թերթերն էլ պէտք է նաեւ դատապարտած լինէին
ADL-ին եւ Ամերիկայի հրեական կոնգրեսին Թուրքիայի ժխտողական
վարչապետին պատված լինելու համար: Հոլոքոստի հերքումը
դատապարտելը չպէտք է նմանվի միակողմանի երթեւեկությամբ փողոցի:
Չպէտք է լինեն երկակի ստանդարտներ: «Armenian Weekly»-ի
խմբագրականը ճշմարտացիօրէն նշել է, որ Ահմադինեժադը եւ Էրդողանը
նոյնատիպ կոչ են արել` ուսումնասիրություններ կատարել
պարզելու համար, թէ արդեօ՞ք այս վայրագութիւնները իրականում
եղել են, մի կոչ, որը խայտառակ կերպով պաշտպանում են ADL-ը եւ
մյուսերը Հայոց ցեղասպանութեան հարցում, բայց ոչ Հոլոքոստի: Ճիշտ
այնպէս, ինչպէս ամերիկահայ կազմակերպութիւնները երբեք կասկածի
տակ չեն առնում Հոլոքոստը, հրեական խմբերն էլ երբեք չպէտք է
կասկածի տակ առնեն Հայոց ցեղասպանութեան փաստերը:
Հրեաները, հայերը եւ ցանկացած այլ ոք պէտք է ցեղասպանութեան
ու Հոլոքոստի ժխտման հետ գործ ունենալիս նոյն ստանդարտը կիրառեն:
Ոչ ոք չպէտք է հեշտ ու հանգիստ հերքի այս ողբերգութիւններից որեւէ
մէկը, եւ ոչ մի խումբ չպէտք է պատուի արժանացնի նրան, ով անարգում է
մարդկութեան դէմ այդպիսի հանցանքների զոհերի յիշատակը: