ՊԱԿԻՍՏԱՆԻ ՆԱԽԿԻՆ ՎԱՐՉԱՊԵՏ ԲԵՆԱԶԻՐ ԲՀՈՒՏՈՆ ՎԵՐԱԴԱՐՁԵԼ Է
ՀԱՅՐԵՆԻՔ
18-10-2007 17:08:00 | | Միջազգային
ԻՍԼԱՄԱԲԱԴ, 18 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Պակիստանի նախկին
վարչապետ Բենազիր Բհուտոն ութ տարուայ կամաւոր տարագրութիւնից յետոյ
վերադարձել է հայրենիք: Նրա ինքնաթիռը, որ Դուբայից է ժամանել,
վայրէջք է կատարել Կարաչիի օդանավակայանում: Ընդդիմադիր Պակիստանի
ժողովրդական կուսակցութեան առաջնորդին օդանավակայանում դիմաւորում
են իր հարիւր հազարաւոր կողմնակիցներ եւ քաղաքի բնակիչներ: Ըստ
որոշ տեղեկութիւնների, ողջ երկրից Կարաչի է ժամանել մէկ միլիոնից
աւելի մարդ:
Բենազիր Բհուտոյի վերադարձը հնարաւոր է դարձել նախագահ Փերվեզ
Մուշարաֆի վարչակազմի հետ բարդ բանակցութիւններից յետոյ, որն այս
տարուայ գարնանը բախուել էր քաղաքական խոր ճգնաժամի: Հասարակական
պառակտվածության յաղթահարման համար կառավարութիւնը եւ Բենազիր
Բհուտոն ստորագրել են Ազգային համաձայնութեան դեկրետ: Փաստաթուղթը
նախատեսում է համաներում քաղաքական գործիչների համար, ովքեր
1988-1999 թուականների ընթացքում զբաղեցնում էին պետական պաշտօններ:
Բացի Բհուտոյից եւ իր ամուսին Ասիֆ Զարդարիից ներման են ենթակայ այլ
կուսակցութիւնների մի շարք գործիչներ: Ազգային համաձայնութեան
դեկրետը, սակայն, դեռ խորհրդարանի հաւանութեանը չի արժանացել: