ՌՈՒՍԱՍՏԱՆԸ ԵՎ ԱՄՆ-Ն ՀԱՄԱՁԱՅՆՈՒԹԻՒՆ ՁԵՌՔ ՉԵՆ ԲԵՐԵԼ ՀՀՊ
ՀԱՐՑԵՐԻ ԱՌՆՉՈՒԹԵԱՄԲ
12-10-2007 20:26:00 | Ռուսաստան | Միջազգային
ՄՈՍԿՈՒԱ, 12 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Ռուսաստանը եւ ԱՄՆ-ն
«երկու գումարած երկու» ձեւաչափով Մոսկուայում կայացած
կոնսուլտացիաների ընթացքում համաձայնութեան չեն հասել
հակահրթիռային պաշտպանութեան (ՀՀՊ) հարցերի առնչութեամբ,
բանակցութիւններից յետոյ յայտարարել է ԱՄՆ պետքարտուղար Քոնդոլիզա
Ռայսը:
«Հակահրթիռային պաշտպանութեան, ինչպէս նաեւ միջուկային
մարտագլխիկների տեղաբաշխման հարցերի շուրջ, որ նախատեսուած են
Մոսկովեան պայմանագրով, համաձայնութիւն ձեռք չբերուեց, բայց մենք
եկանք այն եզրահանգման, որ մեր փորձագետները պէտք է ըստ կարելւոյն
շուտ քննութեան առնեն այդ հարցերը»,- ասել է նա «երկու գումարած
երկու» (ՌԴ ԱԳ ղեկավար, ԱՄՆ պետքարտուղար, Ռուսաստանի եւ ԱՄՆ-ի
պաշտպանութեան նախարարներ) ձեւաչափով հանդիպման արդիւնքներին
նուիրուած մամլոյ ասուլիսի ընթացքում:
«Ինչ վերաբերում է Լեհաստանին եւ Չեխիայի Հանրապետութեանը,
ապա մենք շարունակում ենք աշխատանքն այդ ուղղութեամբ եւ,
բնականաբար, այդ աշխատանքում մենք այժմ կընդգրկենք ռուսական կողմի
մտահոգութիւնները»,- աւելացրել է Ռայսը:
Նշւում է, որ ճեպասուլիսում ՌԴ ԱԳՆ ղեկավար Սերգեյ Լավրովը
յայտնել է, որ «երկու գումարած երկու» ձեւաչափով Ռուսաստանի եւ
ԱՄՆ-ի կոնսուլտացիաները կշարունակուեն «մօտ կէս տարի անց Միացեալ
Նահանգներում»: