«ՄԵԱ ԿՈՒԼՊԱ»-Ն ԱՐԴԷՆ 5 ՏԱՐԵԿԱՆ Է, ՍԱԿԱՅՆ ՇԱՐՈՒՆԱԿՈՒՄ Է ՄՆԱԼ
ԱՐԴԻԱԿԱՆ
02-10-2007 18:45:00 | Հայաստան | Մշակոյթ
ԵՐԵՎԱՆ, 2 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Սցենարի հեղինակ Վահրամ
Սահակեանի եւ բեմադրող ռեժիսոր Արթուր Սահակեանի «Մեա կուլպա»
ներկայացումը արդէն 5 տարեկան է: Բեմադրումից 5 տարի անց էլ այն
դեռեւս արդիական է, ինչի վկայութիւնը ներկայացման ժամանակ
լեփ-լեցուն դահլիճներն են: Այսպիսի կարծիք յայտնեց հոկտեմբերի 1-ին
ներկայացման 5-րդ տարեդարձի կապակցութեամբ հրաւիրուած մամլոյ
ասուլիսում Երեւանի դրամատիկական թատրոնի գեղարուեստական ղեկավար
Արմէն Խանդիկեանը: Նա համոզուած է, որ «Մեա կուլպա» տրագիկոմեդիան
այլեւս պահանջված ներկայացում չի լինի, երբ հասարակութիւնը
կազատուի դրանում բարձրացուած խնդիրներից ու արատներից: «Այս
առումով, թերեւս վաղ է խօոսելը, քանի որ դեռեւս շարունակւում է
արժէքների անկումը բոլոր ասպարէզներում»,- ընդգծեց Ա.Խանդիկեանը:
Ըստ Ա.Խանդիկյանի, թատերական այս ժանրի ներկայացումները
սովորաբար շատ կարճատեւ կեանք են ունենում, սակայն «Մեա կուլպա»-ի
դէպքում այդ չափանիշը չի պահպանուել, իսկ դրա «գաղտնիքը» մէկն է`
ներկայացումը այսօր էլ պահանջված է:
Ներկայացման գլխաւոր դերակատար Հրանտ Թոխատյանի խօսքերով,
ինքը սիրով է բեմ դուրս գալիս, մանաւանդ այս ստեղծագործական ու
դերասանական խմբի հետ: Ըստ նրա, այս տիպի ներկայացում բեմադրելը
շատ բարդ է, քանի որ լուրջ նիւթը պէտք է կարողանալ ներկայացնել
թեթեւ ժանրի մէջ, որն աւելի մեծ ջանք ու վարպետություն է
պահանջում: «Ամէն նոր բեմելը պարտաւորեցնող է, եթէ դերասանը մի
փոքր կորցնի հետաքրքրութիֆւնը, ներկայացումը կտապալուի»,- համոզուած
է նա:
Նշուեց, որ Հ.Թոխատյանի 50-ամեակի կապակցութեամբ 2008թ.
յունվարի 10-ին դերասանական նոյն խումբը հանրութեանը կներկայանայ
նոր` «Անհանգիստ հոգի» ներկայացումով: «Ներկայացումը մի փոքր
ինքնակենսագրական է, սակայն բեմադրուած է այնպէս, որ հետաքրիր է
լինելու նաեւ հասարակութեան համար»,- նշեց Հ.Թոխատյանը: