«ՀԱՅՖԵՍՏ» ՄԻՋԱԶԳԱՅԻՆ 5-ՐԴ ՓԱՌԱՏՕՆԻՆ ԿՄԱՍՆԱԿՑԵՆ 40
ԹԱՏԵՐԱԽՄԲԵՐ
25-09-2007 18:45:00 | Հայաստան | Մշակոյթ
ԵՐԵՎԱՆ, 25 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Հոկտեմբերի 4-14-ն
անցկացուելիք «Հայֆեստ» միջազգային 5-րդ յոբելեանական փառատոնի
ընթացքում Երեւանի 14 թատերական բեմահարթակներում 100
ներկայացումներով հանդէս կգան աշխարհի 33 երկրների 40 կատարողական
խմբեր: Աւանդական դարձած այս թատերական փառատօնին կմասնակցեն 17
թատրոններ:
Ինչպէս սեպտեմբերի 25-ի ասուլիսում յայտնեց փառատոնի նախագահ
Արթուր Ղուկասեանը, փառատօնին ներկայ կգտնուեն հանրաճանաչ
արուեստագէտներ, միջազգային փառատոների նախագահներ, թատերագետներ,
որոնք տեղում կանցկացնեն սեմինարներ եւ «կլոր սեղաններ»` նուիրուած
Հայաստանում մշակոյթային քաղաքականութեանը եւ արտմենեջմենթին:
Ըստ Ա.Ղուկասեանի, փառատոնը հայ հանդիսատեսին հնարաւորութիւն
կընձեռի դիտել տարբեր երկրների մնջախաղի, դրամատիկական,
տիկնիկային, խամաճիկների, ինչպէս նաեւ ժամանակակից պարի թատրոնների
լաւագոյն ներկայացումները: Նշուեց, որ «հայֆեստ»-ի շրջանակներում
կկազմակերպուի նաեւ Տիկնիկային եւ մանկական թատրոնների փառատոն:
«Հայֆեստ»-ի նախագահը յայտնեց, որ 2006թ. երեւանեան
«հայֆեստ»-ը ընդլայնել է իր գործունէութիւնը` դառնալով
Կատարողական արուեստների փառատոն, որի գլխաւոր նպատակն է
Հայաստանում ներկայացնել համաշխարհային մշակոյթը:
Արթուր Ղուկասեանը յայտնեց նաեւ, որ «հայֆեստ-2007»-ի
շրջանակներում տեղի կունենայ «Նոր դրամա» սեմինարների երկրորդ
փուլը` Սորոսի հիմնադրամի աջակցութեամբ:
Փառատոնի ղեկավարը նշեց նաեւ, որ այս տարի ՀՀ մշակոյթի
նախարարութիւնը փառատոնի կազմակերպման համար յատկացրել է 39 մլն
դրամ: