ԱՄՆ-Ն ՊԷՏՔ Է ՈՒԺԵՂԱՑՆԻ ՌԱԶՄԱԿԱՆ ՆԵՐԿԱՅՈՒԹԻՒՆԸ ՊԱՐՍԻՑ
ԾՈՑՈՒՄ,- ՅԱՅՏԱՐԱՐՈՒՄ Է ՌՈԲԵՐՏ ԳԵՅԹՍԸ
19-09-2007 16:05:00 | ԱՄՆ | Միջազգային
ՎԱՇԻՆԳՏՈՆ, 19 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: ԱՄՆ-ի պաշտպանութեան
նախարար Ռոբերտ Գեյթսը «Ուոլ սթրիթ ջորնալ» թերթին տուած
հարցազրոյցում յայտարարել է, որ ԱՄՆ-ին հարկ է Իրաքում թողնել
զորակազմի միայն մի մասը եւ փակել խոշոր ռազմական բազաները,
միաժամանակ մեծացնելով ամերիկեան ՌԾՈՒ եւ ՌՕՈՒ ներկայութիւնը
Պարսից ծոցի տարածաշրջանում:
Պենտագոնի ղեկավարի կարծիքով, անհրաժեշտ է նաեւ ամրապնդել
ռազմական համագործակցութիւնը Պարսից ծոցի պետութիւնների հետ,
որոնք լաւ յարաբերութիւններ ունեն ԱՄՆ-ի հետ: Միաժամանակ հարկաւոր
է յատուկ ուշադրութիւն դարձնել այդ երկրներին ցուցաբերուող
օգնությանը Իրանին հակազդելու համար հակահրթիռային պաշտպանութեան
համակարգերի եւ հակաահաբեկչական ուժերի ստեղծման գործում:
Հարցազրոյցում Գեյթսը նշել է, որ Վաշինգտոնը պէտք է Իրաքում
եւ ողջ տարածաշրջանում վարքի այնպիսի ռազմավարութիւն մշակի, որը
կարժանանա հանրապետականների եւ դեմոկրատների հաւանութեանը եւ
կիրագործուի երկրի նոր նախագահի կողմից:
Նշենք, որ Ջորջ Բուշը ամերիկեան ժողովրդին ուղղուած իր
հեռուստադիմումում անցած շաբաթ յայտարարել էր, որ հաւանութիւն է
տուել Իրաքից ամերիկեան զորակազմի մի մասը դուրս բերելու Իրաքում
ամերիկեան զորակազմի հրամանատար գեներալ Դեյվիդ Պետրեուսի
հանձնարարականներին: