ՍԵՐԲԻԱՆ ԿՈՍՈՎՈՅԻ ԱՌՆՉՈՒԹԵԱՄԲ ՊԱՏՐԱՍՏ Է ՓՈԽԶԻՋՄԱՆ,-
ՅԱՅՏԱՐԱՐՈՒՄ Է ԲՈՐԻՍ ՏԱԴԻՉԸ
18-09-2007 18:10:00 | | Միջազգային
ՊՐԱՀԱ, 18 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Սերբիան պատրաստ է
Կոսովոյի առնչութեամբ հասնելու փոխզիջման, որն ազատութիւն եւ
ժողովրդավարական զարգացում կերաշխաւորի այդ երկրամասին առանց
ոտնահարելու միասնական պետութեան տարածքային ամբողջականութիւնը:
Բելգրադը մերժում է անջատականութիւնը եւ Կոսովոյում նրա
դրսեւորումների մէջ վտանգ է տեսնում ողջ Եւրոպայի համար: Այս մասին
սեպտեմբերի 17-ին Պրագայում յայտարարել է այցով այնտեղ գտնուող
Սերբիայի նախագահ Բորիս Տադիչը:
Սերբական առաջնորդը հանդիպում է ունեցել իր չեխ գործընկեր
Վացլավ Կլաուսի հետ: Չեխիայի նախագահը կոչ է արել Կոսովոյի խնդիրը
լուծել բանակցութիւնների սեղանի շուրջ` հաշուի առնելով սերբական
այդ երկրամասի քաղաքացիների շահերը: Ըստ նրա, Կոսովոյի կարգավիճակի
հարցը, նախ եւ առաջ, Սերբիայի ներքին հարցն է: