ՀՈԼԱՆԴԻԱՅՈՒՄ ԹՈՒՐՔ ԽՈՐՀՐԴԱՐԱՆԱԿԱՆԸ ԿՈՒՍԱԿԻՑՆԵՐԻ ՈՐՈՇՄԱՄԲ ՅԵՏ
Է ԿԱՆՉՈՒԵԼ ՍԵՆԱՏԻՑ
11-09-2007 12:43:00 | | Միջազգային
ԱՄՍՏԵՐԴԱՄ, 11 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Հոլանդիայում
ազգութեամբ թուրք խորհրդարանական Դյուզգյուն Յըլդըրըմը
կուսակիցների պահանջով եւ որոշմամբ յետ է կանչուել Սենատից: Այս
մասին հաղորդում է «Զաման» օրաթերթը:
Մայիսի 29-ին Հոլանդիայի նահանգային խորհրդարանների
ընտրութիւններին Դյուզգյուն Յըլդըրըմը մասնակցել էր Սոցիալիստական
կուսակցութեան կազմում` վերջինիս ցուցակում զբաղեցնելով 18-րդ
տեղը: Սակայն քուէարկութեան ընթացքում ձայների մեծամասնութեամբ
Յըլդըրըմը, զբաղեցնելով ցուցակում 12-րդ հորիզոնակը, ընտրուել էր
Սենատի անդամ: Սակայն կուսակցութեան գլխաւոր քարտուղար Հանս վան
Հեյնինգենը նամակ էր յղել ազգութեամբ թուրք սենատորին եւ պահանջել
մինչեւ օգոստոսի 24-ը վայր դնել իր մանդատը:
Նշենք, որ Հոլանդիայում Սենատի անդամները ընտրվում են
նահանգային խորհրդարանների անդամների կողմից:
Սոցիալիստական կուսակցութիւնն իր պահանջը հիմնաւորում է
նրանով, որ «կուսակցութեան ցուցակը փոփոխման ենթակայ չէ», իսկ
Յըլդըրըմը ընտրուել է 12-րդ թեկնածուի փոխարէն: Կուսակցութիւնը
պահանջել էր, որ վերջինս իր տեղը զիջի ցուցակով իրենից առաջ
գրանցուած թեկնածուներից մէկին:
Թուրք սենատորը դէպքի կապակցութեամբ յայտարարել էր, թէ
«Սոցիալիստական կուսակցութեան որոշումը ժողովրդավարական չէ»,
աւելացնելով, որ «Իմ հրաժարականի հետ կապուած պահանջը կարող է բխել
այն բանից, որ ես ծագումով թուրք եմ: Սակայն չեմ պատրաստւում զիջել
իմ դիրքերը եւ շարունակելու եմ պայքարել»: Սակայն նշւում է,
Դյուզգյուն Յըլդըրըմը չի պատրաստւում բողոքարկել Սոցիալիստական
կուսակցութեան որոշումը: