ԻՐԱՔՈՒՄ ՁԵՐԲԱԿԱԼՈՒԵԼ Է ԻՍԼԱՄԱԿԱՆ ՅԵՂԱՓՈԽՈՒԹԵԱՆ ՊԱՀԱՊԱՆՆԵՐԻ
ԿՈՐՊՈՒՍԻ ՀԵՏ ԿԱՊԵՐ ՈՒՆԵՆԱԼՈՒ ՄԷՋ ԿԱՍԿԱԾՎՈՂ ԱՀԱԲԵԿԻՉ
06-09-2007 13:55:00 | | Միջազգային
ԲԱՂԴԱԴ, 6 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Սեպտեմբերի 4-ին իրաքեան
Քերբելա քաղաքում կոալիցիոն ուժերի զինվորների կողմից ձերբակալուել
է Իսլամական յեղափոխութեան պահապանների կորպուսի (ԻՀՊԿ) հետ կապեր
ունենալու մէջ մեղադրւող մի ահաբեկիչ: Այս մասին յայտարարել է
Իրաքում կոալիցիոն ուժերի ամերիկեան հրամանատարութիւնը:
Ըստ տեղեկութիւնների, ձերբակալուածը կասկածւում է իրաքցիներին
ԻՀՊԿ-ի վարժական ճամբարներ ուղարկելու հետ առնչութիւն ունենալու
մէջ: Նշւում է, որ վերջինս հանդիսանում է նաեւ Բաղդադի կենտրոնում
ահաբեկչական գործողութիւնների նիւթատեխնիկական ապահովման
համակարգողը:
«Այն դէպքում, երբ Իրանը վարում է թաքնված պատերազմ իրաքեան
ժողովրդի դէմ, կոալիցիոն ուժերը կշարունակեն իրականացնել
գործողութիւններ եւ կանխել Իրանից Իրաք արգելուած, մահաբեր
նիւթերի ներմուծման հոսքը»,- յայտարարել է կոալիցիոն ուժերի
հրամանատարութեան մամլոյ քարտուղար Քրիստոֆեր Հարվերը:
Յիշեցնենք, որ, ըստ «Washington Post»-ի, ԱՄՆ-ն որոշել է
ահաբեկչական կազմակերպութիւնների ցանկում ընդգրկել Իրանի էլիտար
զորքերը` 125-հազարանոց Իսլամական յեղափոխութեան պահապանների
կորպուսը:
ԱՄՆ-ի վարչակազմի այս որոշումը կապուած է Իրաքի եւ Աֆղանստանի
գործերին ԻՀՊԿ-ի յարաճուն միջամտութեան, ինչպէս նաեւ այն
աջակցութեան հետ, որը ցուցաբերում է 125-հազարանոց էլիտար կորպուսը
ծայրայեղականներին ողջ Մերձաւոր Արեւելքում: