ՍՊԱՆՈՒԵԼ Է ՀԱՐԱՎԿՈՐԵԱՑԻ ՄԻՍԻՈՆԵՐՆԵՐԻ ԱՌԵՎԱՆԳՄԱՆ ՀԵՏ
ԱՌՆՉՈՒԹԻՒՆ ՈՒՆԵՑՈՂ «ԹԱԼԻԲԱՆ» ՇԱՐԺՄԱՆ ԱՌԱՋՆՈՐԴՆԵՐԻՑ ՄԷԿԸ
04-09-2007 18:47:00 | Աֆղանստան | Միջազգային
ՔԱԲՈՒԼ, 4 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Աֆղանստանում սպանուել է
«Թալիբան» շարժման առաջնորդներից մէկը, որն առնչութիւն է ունեցել
հարավկորեացի միսիոներների առեւանգման հետ: Այս մասին յայտարարել է
Աֆղանստանի Ներքին գործերի նախարարութիւնը:
«Մենք սպանել ենք 16 գրոհայինների, այդ թւում նաեւ` թալիբների
հրամանատարներից մոլլա Մաթինին, որը կարեւոր դերակատարութիւն է
ունեցել Հարաւային Կորեայի քաղաքացիների առեւանգման գործում»,-
յայտարարել է Գազնի նահանգի ոստիկանապետ Ալիշահ Ահմադզաին:
Յիշեցնենք, որ յուլիսի 19-ին թալիբներն առեւանգել էին
մարդասիրական առաքելութեամբ Աֆղանստան ժամանած 23
հարավկորեացիների, որոնցից երկուսին սպանել էին: Որոշ ժամանակ անց,
որպէս բարի կամքի դրսեւորում, նրանք ազատ էին արձակել երկու հիւանդ
կանանց: Օգոստոսի 28-ին Սեուլի եւ «Թալիբան» շարժման
ներկայացուցիչների բանակցութիւնների ընթացքում համաձայնութիւն էր
ձեռք բերուել պատանդների ազատ արձակման շուրջ, ինչը եւ իրականացուել
էր յաջորդ երկու օրերի ընթացքում: