ԵՐԵՎԱՆ, 20 ՕԳՈՍՏՈՍԻ, ՆՈՅԵԱՆ ՏԱՊԱՆ: ՀԽՍՀ ժողովրդական նկարիչ
Էդվարդ Իսաբեկեանի մահուան կապակցութեամբ ստեղծուել է կառավարական
յանձնաժողով` ՀՀ փոխվարչապետ Հովիկ Աբրահամեանի նախագահութեամբ:
Կառավարական յանձնաժողովը օգոստոսի 20-ին տարածել է
հաղորդագրութիւն, որում ասուած է.
«Հայ կերպարուեստը ծանր կորուստ կրեց. 93 տարեկան հասակում
կեանքից հեռացաւ ՀԽՍՀ ժողովրդական նկարիչ, ՀՀ պետական մրցանակի
դափնեկիր, պրոֆեսոր, Երեւանի պատուաւոր քաղաքացի Էդվարդ Իսաբեկյանը:
Էդվարդ Իսաբեկյանը ծնուել է 1914թ. Երեւանի նահանգի Սուրմալու
գաւառի Իգդիր քաղաքում: 1918թ. ընտանիքի հետ Երեւան տեղափոխվելուց
յետոյ սովորել եւ աւարտել է Երեւանի գեղարուեստա-արդիւնաբերական
տեխնիկումը (ներկայիս Փ.Թերլեմեզյանի անուան գեղարուեստի
ուսումնարան), ապա` 1935 թուականից ուսումը շարունակել Թբիլիսիի
գեղարուեստի ակադեմիայում:
Հայրենական Մեծ պատերազմի տարիներին Նաիրի Զարյանի եւ Սողոմոն
Տարոնցու հետ եղել է ռազմաճակատում` հայկական 89-րդ դիւիզիայի
վերաբերեալ նիւթեր հաւաքելու եւ գեղանկարչական գործեր ստեղծելու
նպատակով:
Էդվարդ Իսաբեկյանը Երեւանի գեղարուեստի պետական ինստիտուտի
հիմնադիրներից էր, որտեղ աշխատել է 1945 թուականից մինչեւ կեանքի
վերջը` ղեկավարելով գեղանկարչական արուեստանոցներից մէկը:
Մանկավարժական աւելի քան 60 տարիների ընթացքում նա ստեղծել է իր
դպրոցը եւ ուսուցման գիտական մեթոդիկան, կրթել ու դաստիարակել
շնորհալի արուեստագէտների առնուազն երեք սերունդ:
Դասախօսական աշխատանքին զուգընթաց, էդվարդ Իսաբեկյանը կատարել
է բազմաթիւ հասարակական աշխատանքներ` բազմիցս ընտրուել Երեւանի
քաղաքային խորհրդի պատգամաւոր, Հայաստանի նկարիչների միութեան
քարտուղար:
1967-ից մինչեւ 1987թ. եղել է Հայաստանի պետական (ներկայումս
ազգային) պատկերասրահի տնօրէնը, որտեղ հսկայական ջանքեր է
գործադրել ֆոնդերի հարստացման եւ յատկապէս անցեալի ազգային
արժէքները կորստից փրկելու ուղղութեամբ: Նրա նախաձեռնութեամբ է
բացուել պատկերասրահի Գիւմրու մասնաճիւղը:
Իսաբեկյան արուեստագէտի շռայլ տաղանդը ամենատարբեր
դրսեւորումներ է ստացել ինչպէս գեղանկարչական մեծածաւալ
կոմպոզիցիոն կտավներում, այնպէս էլ` արուեստի հիմնահարցերին նուիրուած
ուշագրաւ յօդուածներում, հրապարակային ելոյթներում եւ
հուշապատումներում: Էդվարդ Իսաբեկեանի արուեստի հիմքը
մարդասիրությունն ու խոր հայրենասիրությունն են, իսկ ոգեշնչման
ակունքները` հայաշունչ գաղափարները, որոնք նրա գործերում
արտայայտուել են Սասունցի Դաւթի, Ծովինարի, Դավիթ Բեկի,
Սայաթ-Նովայի, Ակսել Բակունցի, Թամանցիների եւ ազգային ուրիշ
մեծերի կերպարներում: Մեծ վարպետութեամբ ու հայեցի մտածողութեամբ
ստեղծուած նրա հիասքանչ կտաւները նաեւ համամարդկային հնչողություն
ունեն: Նրա անուրանալի ներդրումը կերպարուեստում նաեւ այն է, որ նա
եղավ թեմատիկ կոմպոզիցիոն ժանրի հիմնադիրը Հայաստանի
Հանրապետութիւնում, որին հետեւեցին ուրիշները: Նա խոր ակօս է
թողել հայ կերպարուեստում:
Իսաբեկեանի բարձրարժէք արուեստը միշտ էլ եղել է արուեստաբանների
ուշադրութեան կենտրոնում: Նրան են նուիրուած բազմաթիւ ստուարածաւալ
ուսումնասիրություններ, յօդուածներ, մենագրութիւններ: Հայաստանի
ազգային պատկերասրահը յատուկ սրահ է յատկացրել նկարչի աշխատանքների
մշտական ցուցադրման համար:
Էդվարդ Իսաբեկյանը երկրին ու ժողովրդին մատուցած ակնառու
ծառայութիւնների համար իր երկարամեայ վաստակաշատ կեանքի ընթացքում
արժանացել է բազմաթիւ մրցանակների ու պարգեւների, այդ թւում`
2004թ.-ին Ամենայն Հայոց Կաթողիկոսի կողմից «Սուրբ Սահակ-Սուրբ
Մեսրոպ» շքանշանի: Արժանացել է Երեւանի պատուաւոր քաղաքացու կոչման:
Նա նաեւ «Իգդիր» հայրենակցական միութեան պատուաւոր նախագահն էր:
Երեւանի քաղաքապետարանը Էդվարդ Իսաբեկեանի կենդանութեան օրոք
որոշում է կայացրել ստեղծելու նրա գեղանկարչական աշխատանքների
մշտական ցուցադրության սրահ:
Հիանալի մարդու, մեծ արուեստագէտի ու քաղաքացու յիշատակը միշտ
վառ կմնայ ժողովրդի, նրա լուսաւոր արուեստի բոլոր երկրպագուների
սրտերում»:
Յանձնաժողովը տեղեկացնում է, որ Էդվարդ Իսաբեկեանի
քաղաքացիական հոգեհանգիստը տեղի կունենայ օգոստոսի 21-ին, ժամը
18:00-ից, Սայաթ-Նովա 5 հասցեում: Օգոստոսի 22-ին, Ալ.Սպենդիարեանի
անուան օպերայի եւ բալետի ազգային ակադեմիական թատրոնի Արամ
Խաչատրեան մեծ դահլիճում (մուտքը Մ.Մաշտոցի պողոտայից) ժամը
12:30-14:00-ին տեղի կունենայ վերջին հրաժեշտը նկարչին, այնուհետ`
հուղարկաւորութեան արարողութիւնը` Երեւանի Կոմիտասի անուան
պանթեոնում: