ՀԲ-Ի ՏՐԱՄԱԴՐԱԾ ԼՐԱՑՈՒՑԻՉ 5 ՄԼՆ ԴՈԼԱՐՈՎ ԿՎԵՐԱՆՈՐՈԳՈՒԻ
ՀԱՆՐԱՊԵՏՈՒԹԵԱՆ 110 ԿՄ ՈՌՈԳՄԱՆ ՆԵՐՏՆՏԵՍԱՅԻՆ ՑԱՆՑ
01-08-2007 20:00:00 | Հայաստան | Տնտեսութիւն
ԵՐԵՎԱՆ, 1 ՕԳՈՍՏՈՍԻ, ՆՈՅԵԱՆ ՏԱՊԱՆ: Համաշխարհային բանկի
տնօրէնների խորհուրդը հաստատել է Հայաստանի ոռոգման համակարգի
զարգացման ծրագրի համար 5 մլն դոլար լրացուցիչ գումարի
տրամադրումը: Ինչպէս օգոստոսի 1-ին լրագրողներին յայտնեց ծրագրի
իրականացման գրասենեակի տնօրէն Ադիբէկ Ղազարեանը, գումարի 15%-ը
որպէս համաֆինանսաւորում կտրամադրեն ջրօգտագործողների
ընկերութիւնները (ՋՕԸ): Այդ գումարով կվերանորոգուեն Արարատի,
Արմաւիրի, Երեւանի, Գեղարքունիքի, Արագածոտնի եւ Կոտայքի մարզերի
110 կմ ընդհանուր երկարությամբ ներտնտեսային ցանցերը:
Ա.Ղազարեանի խօսքերով, մինչ այդ ՀԲ-ի տրամադրած 7,2 մլն
դոլարով վերանորոգուել է 190 կմ ներտնտեսային ցանց, ինչը բաւականին
քիչ է, քանի որ հանրապետութեան ներտնտեսային ցանցը կազմում է 15
հազար կմ: Ըստ նրա, ջրի հիմնական կորուստները` մօտ 60%-ը կամ
տարեկան 300 մլն խմ, արձանագրւում են ներտնտեսային ցանցերում:
Նշուեց նաեւ, որ 1994թ.-ից մինչ օրս ՀԲ-ն Հայաստանի ոռոգման
համակարգերի զարգացման նպատակով յատկացրել է 96,214 մլն դոլարի
գումար, որով վերականգնվել են 26 պատվարներ, մի շարք
բնակավայրերում ջրամատակարարման մեխանիկական համակարգը փոխարինվել
է ինքնահոսով, ինչի շնորհիւ տարեկան էլեկտրաէներգիայի
խնայողությունը կազմել է 51 մլն կվտ/ժամ: Բացի այդ, ստեղծուել են 52
ՋՕԸ-եր, որոնց գործունէութեան շնորհիւ աճել է ոռոգման ջրի
վարձավճարների հաւաքագրման մակարդակը. 2003թ.-ին հավաքագրվել էր
2,3 մլրդ դրամ (6,7 մլն ԱՄՆ դոլար), ապա անցած տարի` 3,2 մլրդ
դրամ: