ԱՄՆ-Ը ՇԱՐՈՒՆԱԿՈՒՄ Է ԴԷՄ ՀԱՆԴԷՍ ԳԱԼ ԹՈՒՐՔԻԱՅԻ` ՀԻՒՍԻՍԱՅԻՆ
ԻՐԱՔՈՒՄ ՀՆԱՐԱՒՈՐ ՌԱԶՄԱԿԱՆ ԳՈՐԾՈՂՈՒԹԻՒՆՆԵՐ ՍԿՍԵԼՈՒ ԾՐԱԳՐԵՐԻՆ
28-06-2007 16:06:00 | ԱՄՆ | Միջազգային
ՎԱՇԻՆԳՏՈՆ, 28 ՅՈՒՆԻՍԻ, ՆՈՅԵԱՆ ՏԱՊԱՆ: ԱՄՆ-ը բացասաբար է
արձագանքել Թուրքիայի Զինուած ուժերի գլխաւոր շտաբի պետ Եաշար
Բույուքանըթի` Հիւսիսային Իրաքում ռազմական գործողութիւններ
սկսելու անհրաժեշտութեան մասին նախօրէին արած յայտարարութեանը:
ԱՄՆ-ի պետքարտուղարութեան մամլոյ խօսնակ Շոն Մքքորմակը
յայտարարել է, թէ ԱՄՆ-ը հասկանում է, որ թուրքական բանակը
ցանկանում է թուրք ժողովրդին պաշտպանել ահաբեկչական
կազմակերպութիւնների յարձակումներից` միեւնոյն ժամանակ նշելով, թէ
Թուրքիայի` Իրաքում ռազմական գործողութիւններ սկսելը հարցի
լուծում չի կարող դառնալ. «Քրդստանի բանուորական կուսակցութիւնը
(PKK) ահաբեկչական կազմակերպութիւն է: Սակայն թուրքական
ուժերի` Իրաքում ռազմական գործողութիւններ սկսելը ստեղծուած
իրավիճակի համար հարցի լուծում դառնալ չի կարող»,- յայտարարել է
մամլոյ խօսնակը:
Շոն Մքքորմակը նշել է նաեւ, որ հարցը կարող է լուծուել երկու
պետութիւնների կառավարությունների համագործակցութեամբ. «Այս
ընդհանուր սպառնալիքի դէմ պայքարելու համար անհրաժեշտ է, որպէսզի
միասնաբար հանդէս գան թուրքական եւ իրաքեան կառավարութիւնները:
Մենք շարունակում ենք աշխատել թէ' թուրքերի, եւ թէ' իրաքցիների հետ եւ
միեւնոյն ժամանակ ձգտում այս հարցի շուրջ երկու պետութիւնների
միջեւ ստեղծել համագործակցութիւն»,- յայտարարել է ԱՄՆ
պետքարտուղարութեան մամլոյ խօսնակը:
Յիշեցնենք, որ յունիսի 27-ին մամլոյ ասուլիսի ժամանակ
Թուրքիայի ԶՈՒ գլխաւոր շտաբի պետ Եաշար Բույուքանըթը յայտարարել էր
Հիւսիսային Իրաքում PKK-ի դէմ ռազմական գործողութիւններ սկսելու
անհրաժեշտութեան մասին: