ԳԱԶԱՅԻ ՅԱՏՈՒԱԾՈՒՄ ՇԱՐՈՒՆԱԿՒՈՒՄ ԵՆ ԶԻՆՈՒԱԾ ԸՆԴՀԱՐՈՒՄՆԵՐԸ
18-05-2007 17:50:00 | | Միջազգային
ԳԱԶԱ, 18 ՄԱՅԻՍԻ, ՆՈՅԵԱՆ ՏԱՊԱՆ: Իսրայելական օդուժը հերթական
անգամ ռմբակոծել է Գազայի հատուածը, որի արդիւնքում զոհուել է աւելի
քան 4 եւ վիրաւորուել 6 մարդ: Ըստ լուրերի, Գազայի հատուածի
հիւսիսային մաս են մտել 15 իսրայելական տանկեր: Այսօր առաւօտեան
պաղեստինեան կողմը ի պատասխան ռմբակոծել է Իսրայելի Ստերոդ քաղաքը:
Ականատեսների վկայութեամբ քաղաքի վրայ նետուել են 9 հատ «Կասսամ»
տիպի ինքնաշէն հրթիռներ: Կան վիրաւորներ:
Նախորդ օրը իսրայելական ռազմա-օդային ուժերի համար թիրախ էր
դարձել «ՀԱՄԱՍ» խմբաւորման անվտանգութեան ուժերի շտաբ-կայանը:
Օդային հարուածի հետեւանքով ոչնչացուել էր խմբաւորման գլխաւոր
հրամանատարներից մէկի աւտոմեքենան, զոհուել էր 6 պաղեստինցի,
որոնցից 4-ը «ՀԱՄԱՍ» խմբաւորման անդամներ են, եւ վիրաւորուել աւելի
քան 40 մարդ:
Յիշեցնենք, որ Իսրայելի օդուժի` Գազայի հատուածի
ռմբակոծությունը տեղի էր ունեցել պաղեստինեան գրոհայինների`
Իսրայելի հարաւային մասը ռմբակոծելուց յետոյ, ինչի հետեւանքով
վիրաւորուել էր աւելի քան 10 իսրայելցի:
Վերջին հինգ օրերին ՀԱՄԱՍ եւ ՖԱԹՀ խմբաւորումների միջեւ տեղի
ունեցած զինուած ընդհարումների հետեւանքով զոհուել էր աւելի քան 40
մարդ:
Իսրայելի պաշտպանութեան նախարարութիւնը բացառել է այն
պնդումները, թէ իսրայելական ռազմա-օդային ուժերի` Գազայի հատուածի
ռմբահարումները կարող են որեւէ կապ ունենալ պաղեստինեան
խմբաւորումների հակամարտութեան հետ: