Յուլիսի 6-ի առաւօտեան ժամը 5-ի մօտ, անյայտ անձինք մետաղեայ ճաղերի արանքից կոտրել են Ա.Դ.Սախարովի անուան Մարդու իրաւունքների պաշտպանութեան հայաստանեան կենտրոնի Շիրակի մասնաճիւղի Գիւմրու գրասենեակի պատուհանի ապակին եւ հեղուկ վառելանիւթով հրկիզել պատուհանն ու պատուհանագոգը: Գրասենեակի հարեւանութեամբ ապրող մարդիկ, տեսնելով կրակը, զանգել են հրշէջ ծառայութիւն եւ ինքնուրոյն միջոցներ ձեռք առել հրդեհը հանգցնելու համար, ինչից յետոյ հրդեհը հանգցրել են: Ուսումնասիրութիւնից պարզուել է, որ էականօրէն վնասուել է գրասենեակի դասընթացների սրահի գոյքի մի մասը եւ սրահն ամբողջութեամբ, ինչի նորոգման ծախսը գերազանցում է 600 հազար դրամը: «Մենք, հայաստանեան քաղաքացիական հասարակութեան ներքոստորագրեալ կազմակերպութիւնների ներկայացուցիչներս, մտահոգութիւն ենք յայտնում այս յարձակման եւ հրկիզման կապակցութեամբ, դատապարտում ենք այս յարձակումը ծրագրողների եւ իրականացնողների յանդգնութիւնը, նշելով, որ սա առաջին դէպքը չէ, երբ փորձում են այս մեթոդներով ահաբեկել կամ պատժել մարդու իրաւունքների պաշտպանութեամբ զբաղուող հասարակական կազմակերութեանը եւ իրաւապաշտպաններին:Ոստիկանութիւնը պարտաւոր է հնարաւոր բոլոր ջանքերը ներդնել, շուտափոյթ բացայայտելու համար յանցագործութեան անմիջական կատարողներին եւ պատուիրողներին, ապահովել բաւարար հրապարակայնութիւն գործի ընթացքի մասին: Կոչ ենք անում իշխանութիւններին հրապարակաւ դատապարտել նմանատիպ բռնութեան դրսեւորումները եւ աջակցել Սախարովի անուան իրաւապաշտպան կազմակերպութեան եւ Գիւմրու գրասենեակի բնականոն գործունէութիւնը շարունակելուն: Յոյս ենք յայտնում ու Սախարովի անուան իրաւապաշտպան կազմակերպութիւնը եւ Գիւմրու գրասենեակը արագ կը յաղթահարեն ժամանակաւոր դժուարութիւնները, մնալով մարդու իրաւունքների պաշտպանութեան դիրքերում այնպէս հետեւողականօրէն, ինչպէս եղել են 15 տարի շարունակ»,- ասուած է հայաստանեան մի շարք ոչ կառավարական կազմակերպութիւնների յայտարարութիւնում:

---