ՀԱՅԱՍՏԱՆԻ ՏԵՂԵԿԱՏՈՒԱԿԱՆ ՏԵԽՆՈԼՈԳԻԱՆԵՐԻ ՈԼՈՐՏԸ ԹԵՎԱԿՈԽԵԼ Է
ԶԱՐԳԱՑՄԱՆ ՈՐԱԿԱԿԱՆ ՓՈՒԼ,- ԱՍՈՒՄ Է ՏԻԳՐԱՆ ԴԱՎԹԵԱՆԸ
03-05-2007 20:00:00 | Հայաստան | Տնտեսութիւն
ԵՐԵՎԱՆ, 3 ՄԱՅԻՍԻ, ՆՈՅԵԱՆ ՏԱՊԱՆ: Հայաստանի Տեղեկատուական
տեխնոլոգիաների (ՏՏ) ոլորտը թեւակոխել է զարգացման նոր փուլ`
քանակականից անցնելով որակականի: Այս մասին մայիսի 3-ին
կազմակերպուած «Հայաստանի տեղեկատուական տեխնոլոգիաների
մրցունակութիւն» խորագրով համաժողովում յայտնեց ՀՀ առեւտրի եւ
տնտեսական զարգացման փոխնախարար Տիգրան Դավթեանը:
Նրա խօսքերով, տեղեկատուական տեխնոլոգիաները կարեւոր
նշանակութիւն ունեն Հայաստանի տնտեսութեան աճի համար: Տ.Դավթեանը
նշեց, որ երկիրը այդ ոլորտը զարգացնելու մեծ ներուժ ունի: Իսկ
ՏՏ-երի կիրառումը այլ ոլորտներում, ըստ նրա, կնպաստի առաւել
մրցունակ տնտեսութիւն ձեւաւորելուն: Փոխնախարարը նշեց նաեւ, որ
Հայաստանը ինտեգրվելով միջազգային տնտեսական համակարգին առաջին
հերթին պէտք է աւելացնի ՏՏ-ի ոլորտի արտադրանքի արտահանման
ծաւալները:
Ըստ «Ձեռնարկութիւնների ինկուբատոր» հիմնադրամի տնօրէն (ՁԻՀ)
Բագրատ Ենգիբարյանի, համաժողովում նախատեսւում է քննարկել
Հայաստանում ՏՏ ոլորտի զարգացման հեռանկարներն ու
ռազմավարութիւնը, ոլորտի խթանմանը, աշխատուժին, գիտահետազօտական
աշխատանքներին եւ հեռահաղորդակցութեանը վերաբերող հարցեր:
Համաժողովին մասնակցում են նաեւ միջազգային մի շարք
կազմակերպութիւններ:
Բ.Ենգիբարյանը նշեց, որ վերջին 5 տարիներին ոլորտում գրանցուել
է տարեկան 20 տոկոսի կայուն աճ: Ներկայումս ՏՏ ոլորտում աշխատում
են շուրջ 160 ձեռնարկութիւններ, որտեղ աշխատատեղերի թիւը հասել է
5 հազարի. մասնագէտների 80%-ը աշխատում է արտասահմանեան
կազմակերպություններում: Վերջին տուեալներով, ՏՏ ոլորտի արտադրանքի
ծաւալը 2006թ.-ին կազմել է 84 մլն ԱՄՆ դոլար: Արտադրանքի մօտ 63%-ը
արտահանւում է: