ԵՐԵՎԱՆ, 18 ԱՊՐԻԼԻ, ՆՈՅԵԱՆ ՏԱՊԱՆ: Երգչուհի Ալլա Լեւոնեանը
նշանակուեց «ԵՈՒՆԻՍԵՖ Հայաստան»-ի Բարի կամքի դեսպան: Ինչպէս ապրիլի
18-ի ասուլիսում յայտնեց ԵՈՒՆԻՍԵՖ-ի հայաստանեան գրասենեակի
ներկայացուցիչ Շելդոն Յեթը, Ա.Լեւոնեանը Բարի կամքի դեսպան է
ընտրուել ոչ միայն իր տաղանդի եւ հանրաճանաչութեան, այլեւ հայ
երեխաների բարօրութեանն ուղղուած բարեգործական ծրագրերին
մասնակցելու պատրաստակամութեան համար: «Յուսով ենք, որ Ա.Լեւոնեանի
ձայնը կօգնի մեզ` հասարակութեան ուշադրութիւնը բեւեռելու
Հայաստանի երեխաների ամենակարեւոր խնդիրների վրայ»,- նշեց
ԵՈՒՆԻՍԵՖ-ի ներկայացուցիչը:
«Ինձ համար մեծ պատիւ է ստանձնել նման պատասխանատու
առաքելութիւնը: Մինչ օրս ես պատասխանատու էի միայն իմ երկու
երեխաների համար, այժմ արդէն պատասխանատւութիւն եմ զգում
Հայաստանի բոլոր երեխաների համար»,- նշեց երգչուհին` յաւելելով, որ
պատրաստ է անել հնարաւորը, որպէսզի երեխաների հիմնախնդիրները միշտ
մնան հասարակութեան ուշադրութեան կենտրոնում:
Ա.Լեւոնեանը յայտնեց, որ երեխաների իրաւունքների
պաշտպանութեան քարօզչութեան նպատակով հանդէս կգայ բարեգործական մի
շարք ծրագրերով: